Үбүлүөйдээх Улуу Кыайыы 75 сылынан Бүлүү улууһун Чочу нэһилиэгэр «75 үтүө дьыала» аахсыйа ыытыллар.
edersaas.ru
Тэрээһин туһунан нэһилиэк баһылыга Петр Догоюсов бу курдук билиһиннэрэр:
— Бу аахсыйа чэрчитинэн «Сылгыһыт күнүнэн» анаан олохтоох дьаһалта, «Күнчээнэ» уһуйаан уонна Ил Түмэн дьокутаата Александр Гоголев көмөлөрүнэн Чочу нэһилиэгин сылгыһыттарыгар ичигэс таҥас, кээнчэ уонна үтүлүк бэлэх ууннубут.
Сүрүн тэрээһиннэрбит аахсыйа быһыытынан Ийэ дойдуга бэриниилээх буолуу сылынан сибээстээн биир дойдулаах дьон өрүү биир сомоҕо буолан тутуспутунан, бэйэ бэйэҕэ көмөлөһө, өйөнсө сылдьарбыт туһугар ыытыллаллар.
«Ойуурдаах куобах охтубат» дииллэринии, дойдулаах-дьонноох киһи өйөбүллээхтик сананара чахчы.
Кырдьык, Чочу сылгыһыттара ичигэс таҥаһы бэлэх ылан, төһө эрэ үөрдүлэр. Таҥас бэлэхтэппиттэриттэн буолбатах (сылгыһыт дьон ичигэс таҥастара дэлэйэ чахчы) — биир дойдулаахтара кинилэргэ болҕомтолоруттан!
Елена ПОТОЦКАЯ, «Саха сирэ» хаһыат, edersaas.ru
Хаартыска — нэһилиэк дьаһалтатын архыыбыттан.