Кулун тутар 6 күнүгэр Бүлүү улууһун Чочу нэһилиэгэр Дьаам күөлгэ Аҕа сылыгар аналлаах балыксыттар хамаанданан муус аннынан балыктааһыҥҥа күрэҕэ ыытылынна.
Нэһилиэк баһылыга Петр Догоюсов инстаграмҥа баар станицатыгар:
— Күрэххэ уопсайа түөрт хамаанда кыттыыны ылла. Хамаандалар бэйэлэрэ тус-туспа ааттаахтар, эмблемалаахтар, таҥастаахтар. Тыҥааһыннаах бииртэн биир түһүмэҕи ааһан, түмүккэ «Хоһуун» хамаанда кыайыылаах таҕыста. Иккис миэстэ — «Көмүс хатырык» хамаанда. Үһүс миэстэ — «Клевый» хамаанда. Төрдүс миэстэ — «Нептун» хамаанда. Кыттааччылар грамоталарынан, бириистэринэн наҕараадаланнылар. Муус аннынан балыктааһын күрэҕэр кыттыбыт бары хамаандаларга олус үчүгэй, чиэһинэй киирсиилээх тэрээһини бэлэхтээбиттэригэр махтал. Маннык хабааннаах, Аҕа суолтатын үрдэтэр, төрүт үгэстэри тарҕатар, нэһилиэк эр дьонун көҕүлүүр, түмэр, араас тэрээһиннэр, күрэхтэр сыл устата салгыы бара туруохтара, — диэн суруйда.
edersaas.ru