Читаҕа дьахталлар национальнай бырайыагы олоххо киллэриини дьүүллэстилэр

Бу күннэргэ Чита куоракка Уһук Илин дьахталларын форума буолан ааста.

edersaas.ru

Форумҥа Уһук Илин уокуруктан 11 эрэгийиэн бэрэстэбиитэллэрэ, Кытай уонна Монголия Өрөспүүбүлүкэлэриттэн  кыттыыны ыллылар. Дискуссия былаһааккаларыгар сүрүннээн «Демография», «Үөрэхтээһин», «Доруобуйа харыстабыла», «Экология» уонна «Култуура» хайысхаларга национальнай бырайыактары ырыттылар. Биир суолталаах боппуруоһунан социальнай бырайыактарга РФ Бэрэсидьиэнин граннарыгар кыттыы туһунан кэпсэтии буолла. Маны тэҥэ дьахталлар “төгүрүк остуолларга” предпринимательство уонна норуоттар икки ардыларыгар бииргэ үлэлээһин туһунан санааларын атастастылар.

Форум Забайкальскай кыраай дьахталларын көҕүлээһининэн ыытылынна. Тэрээһин РФ Бэрэсидьиэнин Уһук Илиҥҥи федеральнай уокуруктааҕы бэрэстэбиитэлэ Юрий Трутнев өйөбүлүнэн буолла. Форумҥа Федерация Сэбиэтин, Госдуума дьокутааттара, уокурук ситэриилээх былааһын уорганнарын, уопсастыбаннай тэрилтэлэр бэрэстиибэтэллэрэ кыттыыны ыллылар.

— Форум кыттыылаахтарын этиилэрэ Арассыыйа эрэгийиэннэригэр дьиэ кэргэн олоҕо тупсуутугар, дьон бэйэ дьарыктаах буолуутугар усулуобуйаны тэрийиигэ 12 национальнай бырайыагы олоххо киллэриигэ төһүү күүһүнэн буолуоҕа, — диэн форум кыттыылаахтарыгар туһаайан бэйэтин эҕэрдэ тылыгар бэлиэтээтэ РФ Бэрэсидьиэнэ Владимир Путин.

Саха сириттэн дьахталлар уопсастыбаннай тэрилтэлэриттэн таҥыллыбыт анал дэлэгээссийэни СӨ Дьахталлар уопсастыбаннай тэрилтэлэрин сойууһун салайааччыта, РФ Дьахталларын сойуустарын Бюротун чилиэнэ Анжелика Андреева салайан илдьэ сырытта. Кини форумҥа саха дьахталларын кыттыыларын туһунан бу курдук билиһиннэрдэ:

— Саха сириттэн тиийбит дэлэгээссийэ форумҥа бэрт көхтөөхтүк кытынна. Ол курдук, мин тус бэйэм “Демография” национальнай бырайыакка өрөспүүбүлүкэҕэ дьиэ кэргэттэргэ туох өйөбүл оҥоһулларын, оҕону иитиигэ төрөппүттэр оруолларын туһунан сырдаттым. Томпо улууһуттан сылдьар дэлэгээт, баһылыгы социальнай боппуруостарга солбуйааччы Оксана Назаренко “Доруобуйа харыстабыла” национальнай бырайыакка омук доруобуйатын бөҕөргөтүүгэ уопсастыбаннас кылаатын,

СӨ Дьахталлар уопсастыбаннай тэрилтэлэрин сойууһун президиумун чилиэнэ Оксана Новгородова коммерческайа суох тэрилтэлэр чөл олоҕу тутуһууга социальнай характердаах ыарыылары бопсор үлэни ыытыыларыгар, “Үөрэхтээһин” национальнай бырайыакка Чурапчы сэлиэнньэтигэр үлэлиир Дьахталлар сэбиэттэрин салайааччыта Екатерина Иванова уһулуччу айдарыылаах оҕону кытта оскуолаҕа киириэн иннинээҕи сааһыттан үлэлэһии, СӨ Идэлээх сойуустар федерацияларын бэрэссэдээтэлин солбуйааччы, СӨ Дьахталлар уопсастыбаннай тэрилтэлэрин сойууһун бочуоттаах бэрэссэдээтэлэ Валентина Кириллина “Култуура” национальнай бырайыакка өрөспүүбүлүкэҕэ дьахталлар уопсастыбаннай тэрилтэлэрэ уонна Уопсастыбаннай Балаата бииргэ үлэлээһиннэрин холобурун,  

Ньурба улууһуттан сылдьар Ньурба куорат Бизнес-инкубаторын салайааччыта Ньургуйаана Михайлова “Экология” национальнай бырайыакка Бүлүү улуустарын бөлөҕөр айылҕа харыстабылыгар ыытыллар үлэ туһунан сиһилии сырдаттылар.

РФ Дьахталларын Сойууһун бэрэсэдээтэлэ, Федерация Сэбиэтин чилиэнэ Екатерина Лахова:

— Забайкальскай уокурукка ыытыллыбыт тэрээһин Арассыыйа бары эрэгиэйиннэригэр дьахталлар көҕүлээһиннэринэн ыытыллар национальнай бырайыактары олоххо киллэриигэ туһуламмыт хайысхалары ырытар форумнары ыытыыга суолу бастакынан аста, — диэн бэлиэтээтэ.

Онон «бастакы хараҥаччы» үлэтэ өссө тэтимирэн, мантан инньэ Арассыыйа үрдүнэн көхтөөхтүк ыытыллыаҕа.

Елена ПОТОЦКАЯ, «Саха сирэ» хаһыат, edersaas.ru

Хаартыска — социальнай ситимнэртэн.