Бүлүү улууһун Чинэкэтин олохтооҕо Александр Корякин нэһилиэгиттэн 15 км тэйиччи сиргэ, «Уотту» учаастакка туспа хаһаайыстыба тэринэн олорбута биэс сыл буолла.
edersaas.ru
Александр Гаврильевич кэргэнэ Марфа Кирилловналыын төгүрүк сылы быһа манна олохсуйан олороллор. 1996 сыллаахха «Эрэл» бааһынай хаһаайыстыбаны бастаан утаа аҕалара Гаврил Корякин тэриммит. Онтон 2004 сылтан Александр Гаврильевич докумуонун бэйэтин аатыгар көһөртөрбүт.
Ходуһаны – арыандаҕа
Корякиннар хаһаайыстыбаларын сыыйа элбэтэллэр. Бу туһунан дьиэлээх хаһаайын маннык кэпсиир:
— Бастаан биир ынахтан саҕалаан, билигин сылгыга, куска, козаҕа, кроликка, кууруссаҕа, сибиинньэҕэ тиийэ ииттэбит.
Козаны Бүлүү куораттан чааһынай дьонтон атыыласпыппыт. Онтон Кыһыл Сыыртан, кэлин Илбэҥэттэн эбиммиппит.
Оттуур ходуһа тиийбэт буолан, олохтоох дьаһалтаттан арыандаҕа сир ылбыппыт. Кыһын Т-16 тыраахтарынан хотонтон ноһуоммутун таһаарабыт, урулуоннаах оппутун соһон киллэрэбит. Бааһынаҕа бурдук ыһарга эргэ сиэйэлкэни оҥостон, ыһыыга тутта сылдьабыт, бороно диискэ оҥостон туһанабыт.
Эбии тиэхиньикэ өттүнэн Корякиннар от охсор, мунньар, пресстиир тэриллэрдээхтэр. Отторун тыраахтарынан дьиэлэрин таһыгар тиэйэн аҕалаллар.
Уһуйааны этинэн хааччыйаллар
Корякиннар сатабыллаахтык дьаһанан, бородууксуйаларын хамаҕатык батараллар.
— Үүппүтүн Бүлүү куорат «Сыа Бүлүү» ТХПК-тын кытта дуогабардаһан туттарабыт. Сүөгэйбитин атыылыыбыт. Идэһэ этинэн дуогабарынан олохтоох оҕо саадын хааччыйабыт, — диэн ыал аҕа баһылыга кэпсиир. Маны таһынан, бааһынай хаһаайыстыба салайааччыта биирдиилээн дьону кытта кэпсэтэн, этин уонна арыытын хамаҕатык батарар эбит. Онон Корякиннар, ырыынак тылынан эттэххэ, бэйэлэрэ «бастайааннай килийиэннэрдээхтэр».
«Судаарыстыбаттан туох көмөнөн туһанаҕыт?» диэн ыйыппыппар, Александр Гаврильевич: «Күрүө тутуутугар, бурдук ыһыытыгар үбүнэн көмө ылабыт», — диэн хоруйдуур. Оттон «туох ыарахаттары көрсөҕүт?» диэн ыйытыыга ыал ийэтэ Марфа Кирилловна:
— Ынах төбөтүгэр 30 тыһыынча солкуобай көрүллэрин кыайан туһаммаппыт. Биир ынахтан 1800 лиитэрэ үүтү ыатаххына, итинник өйөбүл көрүллэр буоллаҕына, биһиэнэ онно кыранан тиийбэт. Онон ити көмөҕө кыайан хапсыбаппыт, — диэн быһаарда.
Тыа сиригэр ханна да буоларын курдук, Чинэкэ Корякиннарын хаһаайыстыбатын сайдыытын уматык сыаната үрдүү турара олуһун атахтыыр. Биллэн турар, сүрүн кыһалҕалара бу. «Сир докумуонун оҥорторуу эмиэ олус эрэйдээх, кэмигэр учуокка туруорбаккалар, мэһэй үөскүүр», — диэн кэпсэтиибитин түмүктүүр Александр Корякин.
… Корякиннар хаһаайыстыбаларын докумуонун кыыстара Анастасия оҥорор. Онон бу ыалларга көлүөнэни көлүөнэ солбуйан, хаһаайыстыба эрэллээх илиигэ киирэн иһэр кэскиллээх.
Елена ПОТОЦКАЯ, «Саха сирэ» хаһыат, edersaas.ru