Черскэйгэ мэдиссиинэ үлэһиттэригэр, учууталларга дьиэ-уот боппуруоһун быһаарыахтара
СӨ Бырабыыталыстыбатын бэрэссэдээтэлэ Андрей Тарасенко Аллараа Халымаҕа үлэтинэн тиийэ сылдьан, Черскэйгэ социальнай тэрилтэлэр үлэлэрин билистэ.
Оройуоннааҕы киин балыыһаҕа быраастар мэдиссиинэ үлэһиттэрин дьиэнэн-уотунан хааччыйыы боппуруоһун көтөхтүлэр, ол иһигэр «Земскэй доктор» бырагырааманан үлэлии кэлбит исписэлиистэргэ эмиэ. Билиҥҥи туругунан аҕыс быраас, икки орто персонал кыбартыыра куортамнаан олороллор.
Оройуон баһылыга Валерий Сентяков Черскэйгэ биэс мэндиэмэннээх тутуу тохтоон турарын эттэ. Үп-харчы көрүлүннэҕинэ уонна тутуу үлэтэ сөхсүтүлүннэҕинэ, тутуу социальнай олорор дьиэ быһыытынан мэдиссиинэ үлэһиттэригэр уонна учууталларга бэриллиэн сөп диэтэ. Андрей Тарасенко СӨ Тутуу министиэристибэтигэр тутууга бэрэбиэркэни ыытарга уонна чугастааҕы кэмнэргэ этиилэри киллэрэргэ соруйда.
Өрөспүүбүлүкэҕэ Ил Дархан Айсен Николаев бигэргэтиитинэн салҕанар доруобуйа харыстабылын бастакы звенотун саҥатытыы бырагырааматын иитинэн, Арктика оройуоннарыгар поликлиникалаах уонна 23 киһи сытан эмтэнэр куойкалаах киин балыыһаны тутууга бырайыак оҥоһуллубут.
Хотугу норуоттар Арктикатааҕы кэллиэстэригэр Андрей Тарасенко кэллиэс салалтатын кытта хоту үгэстийбит салааларга каадырдары бэлэмнээн таһаарар үөрэх кыһатын сайыннарыы боппуруоһун дьүүллэстэ. Кэллиэһи сайыннарыы сүрүн хайысхаларыттан биирдэстэринэн өрөспүүбүлүкэ атын Арктическай оройуоннарыттан устудьуоннары угуйуу, бырамыысыланнас тэрилтэлэрин кытары хардарыта сибээстээх үлэ, тэрилтэлэр наадыйыыларын учуоттаан идэни кэҥэтии буоларын бэлиэтээтилэр.
+1
+1
+1
+1
+1
+1
+1