Бу нэдиэлэҕэ Черскэйгэ Дьокуускайтан массыынанан «Ямаха Викинг-5» диэн алта снегоходу уонна кыһыҥҥы таҥаһы-сабы тиэрдибиттэр.
Бу туһунан улуус.медиа иһитиннэрэр. Заповедник иниспиэктэрдэрэ Арктика уустук усулуобуйатыгар үлэлииллэр. Черскэйгэ заповедник сүрүн баазатыттан, кордонтан ыраах сиринэн тайаан ботурууллууллар. Онон саҥа тиэхиньикэ тиийэргэ уустук, ыраах учаастактары көрөргө көмөлөөх буолара саарбахтаммат.
«Бүгүн иниспиэктэрдэр Валерий уонна Евгений Арбатскайдар саҥа көлөлөрүнэн учаастактары көрө-истэ бардылар«, — диэбит «Өлүөнэ очуостара» национальнай паарка» дириэктэрин солбуйааччы — «Эһэ арыыта» («Медвежьи острова») заповедник (ГПЗ) дириэктэрэ Иван Суздалов.
«Экология» национальнай бырайыак иитинэн уонна «Сохранение биологического разнообразия и развитие экологического туризма» федеральнай бырайыагы олоххо киллэриинэн «Өлүөнэ очуостара» национальнай бырайыакка 2020 сыллаахха «Эһэ арыыта» заповедник баазатын материальнай-тэхиньиичэскэй өттүнэн тупсарарга тус сыаллаах субсидия көрүллүбүтэ.
«Черскэйгэ былырыыҥҥыттан тиэхиньикэни, араас тэрили, ол иһигэр кыһыҥҥы таҥаһы-сабы аҕалыы үлэтэ көхтөөхтүк ыытыллар. Саас диэки «Трекол» диэн хаарынан, бадараанынан сылдьар өссө биир көлөнү уонна УАЗ-микроавтобуһу күүтэбит. Тиэхиньикэни, тэрили аҕалыы тиһиктээхтик салҕанар. Биһиги өссө уунан сылдьарга көлөлөрү: катердары, аэролодкалары уонна моторнай лодкалары ылыахтаахпыт«, — диэн «Өлүөнэ очуостара» национальнай паарка дириэктэрэ Аркадий Семёнов иһитиннэрбит.
+1
+1
+1
+1
+1
+1
+1