Аллараа Халыма Черскэй бөһүөлэгэр таһырдьа бүгүн + 8 кыраадыс бэлиэтэнэн соһутта.
Жанна Дмитриева, Черскэй оскуолатын дириэктэрэ:
— Бэҕэһээҥҥиттэн “плюс” температура турар. Бу гипертоническай ыарыылаахтарга бэрдэ суох. Сылдьарга олус халтараан буолла, кырыыһаттан таммалыыр. Бу кэнниттэн тоҥордоҕуна, табаларбытыгар, дьэ, куһаҕан буолара буолуо. Табалар лабыкталарын кыайан хаһан аһаабакка иэдэйиэхтэрэ диэн куттаналлар. Оттон сылыйыыттан таһырдьа оонньоору оҕолор үөрэллэр.
Михаил Руднев, Походскай хочуолунайын оператора:
— Походскайга билигин температура — 4 кыраадыһы көрдөрөр. Хаар инчэҕэй соҕус, кыратык халтараан. Хочуолунайбыт этэҥҥэ, үлэлии турар. Билигин Черскэйгэ диэри буранынан айанныыллар. Массыына суола аһылла илик. Маннык сылаас турдаҕына, хойутуура буолуо.
Диана Слепцова, Колымскай балыыһатын үлэһитэ:
— Бэҕэһээ эмиэ сылаас этэ. Бүгүн даҕаны оннук күн-дьыл турар. Кырыыһаттан таммах түһэр. Дьон доруобуйатыгар эмискэ сылыйыы охсулаах бөҕө буоллаҕа. Хааннарын баттааһына үрдүк дьон ордук эрэйдэнэллэр быһыылаах. Халлаан уларыйаары гыммытыгар уонна бу күннэргэ итинник ыарыылаахтар көрдөрүннүлэр. Өрүс тааҥныыр дииллэр, онон суол аһылла илик.
Женни СТРЮКОВА.
Хаартыска архыыптан.
www.edersaas.ru