Маны аах Уопсастыба

Черскэй саҥа уһуйааннанна

Аллараа Халыма оройуонугар Черскэй бөһүөлэгэр 75 оҕо сылдьар саҥа уһуйаана үлэҕэ киирдэ.
Бу үөрүүлээх күнүнэн Бырабыыталыстыба аатыттан СӨ Тас сибээскэ уонна норуоттар дьыалаларыгар миниистир Гаврил Кириллин  истиҥник эҕэрдэлээтэ. «СӨ Бырабыыталыстыбатын бэлиитикэтэ хас биирдии нэһилиэнньэлээх пуун социальнай тутулун тупсарар соруктаах. Бу оҕолор үүнэн-сайдан тахсалларыгар туһуланар», — диэтэ кини.
СӨ Арктиканы сайыннарыыга уонна хотугу норуоттар дьыалаларыгар министиэристибэ бэрэстэбиитэлэ Аркадий Диодоров бөһүөлэк олохтоохторун умнуллубат үөрүүлээх күннэринэн эҕэрдэлээн туран: «СӨ сайыннарыы бырагырааматын иитинэн, Арктикатааҕы зона тэтимнээхтик сайдарыгар, тутуулар ыытыллалларыгар эрэнэбин», — диэн санаатын биллэрдэ. Салгыы э5эрдэтин Үөрэх министиэристибэтин аатыттан Кирилл Данилов, ресурснай киин бэрэстэбиитэлэ тиэртэ.
Аллараа Халыма оройуонун баһылыга Валерий Сентяков докумуону оҥорууттан саҕалаан дьиэ атаҕын түһэриигэ, тутууну ыытыыга, бүгүҥҥү күҥҥэ диэри үлэлэспит бары дьоҥҥо махтанна. Саҥа уһуйаан «Северянка» оҕо саадын филиала буолар.
Сэбиэдиссэй Галина Габайдуллина «Кинг-95» тутааччыларыгар, СӨ Бырабыыталыстыбатыгар, Үөрэх министиэристибэтигэр махтанна уонна филиал «Северянка» оҕо саадын курдук үлэтигэр бастыҥ көрдөрүүлээх уһуйаан буолуоҕар эрэннэрдэ. Ити кэнниттэн баһылык Валерий Сентяков Галина Габайдуллинаҕа уһуйаан бэлиэтин — күлүүһү дохсун ытыс тыаһыгар доҕуһуоллатан туттарда. Уһуйаан аһыллыытын көрдөрөр кыһыл лиэнтэни үөрүүлээх быһыыга-майгыга быстылар. Ол кэнниттэн мустубут ыалдьыттар бука бары уһуйааҥҥа киирэннэр кырачааннар ырыаларын-хоһооннорун үөрэ-көтө көрдүлэр.
75 миэстэлээх уһуйааны тутуу боппуруоһа, үһүттэн сэттэтигэр диэри саастаах оҕолор уһуйааннарыгар уочараты суох оҥорор сыаллаах, РФ Бэрэсидьиэнин «О мерах по реализации государственной политики в области образования и науки» бырагырааматын иитинэн быһаарыллыбыта.
0
0