Бүгүн Ил Түмэн сессиятыгар Аллараа Халыма улууһун Черскэй бөһүөлэгин дьокутааттарын дьылҕата быһаарылынна. Санатан эттэххэ, сэтинньигэ парламеҥҥа “дьокутааттар үс ый устата биир да мунньаҕы ыыппатылар диэн суут уурааҕар олоҕуран үлэлэрин тохтоторго” диэн ис хоһоонноох сокуон барыла киирбитэ.
Черскэйгэ былырыын бэс ыйыгар быыбар ыытыллан, уон дьокутаат талыллыбыта. Кинилэр талыллыахтарыттан барыта 17 мунньаҕы ыыппыттар. Ол быыһыгар олунньуттан ыам ыйыгар диэри биир да мунньаҕы тэрийбэтэхтэр. Дьокутааттар бэйэлэрэ этэллэринэн, сорохторо командировкаҕа, үөрэххэ баран хааланнар, кыайан мустубакка үс ый устата мунньахтарын ыыппатахтар (муниципальнай тэриллии устаабынан, дьокутааттар үс гыммыт иккилэрэ баар эрэ түгэнигэр мунньаҕы ыыталлара көҥүллэнэр). Манна сыһыаран эттэххэ, өскөтүн дьокутааттар үс ый устата биир да мунньаҕы ыыппатах буоллахтарына, ол суут уурааҕынан бигэргэннэҕинэ, салгыы үлэлиир-үлэлээбэт боппуруостара регион салайааччытыгар, парламеныгар тиийэ көрүллэр.
Аллараа Халыма улууһун, Черскэй бөһүөлэгин аатыттан киирбит суруктары көрдөххө, дьокутааттар маннык балаһыанньаҕа киирбиттэрэ урукку баһылыктарын кытары сибээстээх эбит. Ити кэмҥэ бөһүөлэк иэстэн иэскэ киирэн, бүддьүөтэ таҥнары барбыт. Билиҥҥи туругунан, 1,5 мөл. солк. иэстээх. Онон, бииринэн, быыбары хат ыытар үптэрэ-харчылара да суох, иккиһинэн, дьокутааттар саҥа баһылыктарын Алексей Марковы (быйыл балаҕан ыйыгар талыллыбыта) кытары тэҥҥэ биир ситимнээхтик үлэлээн эрэллэр. Ол иһин Ил Түмэн дьокутааттара бу боппуруоһу үөрэтэн көрөн баран, сокуон барылын ылымматылар. Онон Черскэй дьокутааттара салгыы үлэлиир буоллулар.
Манна даҕатан эттэххэ, бу маннык быһыы-майгы, олохтоох салайыныы сэбиэтин үлэтин сокуонунан тохтотуу, биһиги өрөспүүбүлүкэбитигэр былырыыҥҥыттан олус сытыытык турда. Ааспыт сылга Ил Түмэҥҥэ Өктөм нэһилиэгин уонна Бүлүү улууһун сэбиэттэрин үлэлэрин тохтотор-тохтоппот боппуруос көрүллүбүтэ. Ол түмүгэр Өктөмҥө дьокутааттар иккиһин талыллыбыттара, оттон Бүлүүгэ сэбиэт салгыы үлэлиир көҥүлү ылбыта.
Аграфена КУЗЬМИНА.