Арассыыйа футболга сүүмэрдэммит хамаандатын сүрүн тириэньэрэ Станислав Черчесов ФИФА “Сыл тириэньэрэ” аатыгар түһэрилиннэ. 54 саастаах исписэлиис салалтатынан Арассыыйа хамаандата быйылгы аан дойду чөмпүйэнээтигэр хаһааҥҥытааҕар да тахсыылаахтык оонньоото, финал чиэппэригэр тиийэри ситистэ.
Черчесовы сэргэ, “Сыл тириэньэрэ” аакка сорунааччыларынан Массимилиано Аллегри («Ювентус»), Эрнесто Вальверде («Барселона»), Хосеп Гвардиола («Манчестер Сити»), Златко Далич (Хорватия), Дидье Дешам (Франция), Зинедин Зидан («Реал»), Юрген Клопп («Ливерпуль»), Роберто Мартинес (Бельгия), Гарет Саутгейт (Англия), Диего Симеоне («Атлетико») ааттаннылар.
Үс финалиһы кэлин иһитиннэриэхтэрэ, оттон кыайыылаах аата балаҕан ыйын 24 күнүгэр Лондоҥҥа The Best FIFA Football Awards шоу кэмигэр биллиэҕэ.
Роман Попов, «Саха сирэ» хаһыат, edersaas.ru