Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, вакцинация салҕанар. Билиҥҥи туругунан, кэлбит вакцина барытын кэриэтэ дьоҥҥо бэрилиннэ. Кулун тутар 22 күнүгэр 1500 устуука быһыы кэлэн, вакцинацияны эрдэ бүтэрбит 4 улууска уонна Дьокуускайга түҥэтилиннэ. Чэппиэргэ өссө 3600 устуука кэлиэхтээх.
Ольга Балабкина иһитиннэрбитинэн, билигин 156 вакцинация пууннара, 110 мобильнай биригээдэлэр үлэлииллэр. Кинилэргэ быһыыны ылыахтарын баҕалаахтар уочараттара улахан. Онон вакцина кэллэр эрэ, кинилэри ыҥыртаан, биэрэн саҕалыахтара. Кулун тутарга, муус устарга маассабай вакцинация салҕаныаҕа.
Төһө да ыарыы ахсаана намтаатар, хааччахтыыр миэрэлэр сымнааталлар, бэйэни харыстаныы миэрэлэрин (маасканы кэтии, тэйиччи сылдьыы, о.д.а.) тутуһуу ирдэнэр. Тоҕо диэтэр, ыалдьыбыт, балыыһаҕа сытар дьон бары кэриэтэ – аҕам саастаах уонна сүрэх-тымыр, эндокриннай олоҕурбут ыарыылаах дьон.
Бу өрөбүллэргэ куорат мээрин талар быыбар буолар. Учаастактарга харыстанар миэрэлэри тутуһуу ирдэнэр.
Ангелина Васильева, “Саха сирэ” хаһыат, edersaas.ru
Хаартыска:http://ykt.ru