Саҥа дьылы дьон иэһэ суох көрсөөрү түбүгүрэр. Ол иһин араас аахсыйалар,чэпчэтиилэр ыытыллалларын сэргиир.
“СӨ ОДьКХ “ тэрилтэтэ олохтоохтор хомунаалынай төлөбүрү кэмигэр төлүүллэрин ситиһээри эмиэ сонун тэрээһини тобулла. Тэрилтэ пресс-сулууспата иһитиннэрбитинэн, бэйэтин туһанааччыларыгар “Кыбартыыраҥ төлөбүрүн кэмигэр төлөө – 25 % кешбэктэ ыл” диэн Саҥа дьыл иннинээҕи бырагырааманы биллэрдэ.
Тустаах бырагыраамаҕа бу өҥөнү кэмигэр төлөөн иһэр (ахсынньы ыйы эмиэ), тэрилтэ хааччыйар 26 оройуонун (Бүлүү оройуонун, Кэбээйи улууһун өрүс уҥуоргутааҕы учаастагын олохтоохторуттан уонна “Коммункомплектация” филиалыттан уратылар) олохтоохторо кыттыахтара.
Сүүйүүнү ыытыы “Коммунтеплосбыт” оройуоннааҕы учаастактарыгар 2019 сыл ахсынньы 30 күнүгэр олохтоох бириэмэнэн 15:00 чаастан ыытыллыаҕа. Хас биирдии оройуоҥҥа биирдии кыайыылааҕы быһаарыахтара. Кыайыылаахтар 2020 сыл устата кыбартыыра хомунаалынай төлөбүрүттэн 25 бырыһыаннаах чэпчэтиинэн туһаныахтара.
Бу аахсыйа туһунан “СӨ ОДьКХ “ ГУТ саайтыттан билсиҥ: http://jksakha.ru/page/163
“СӨ ОДьКХ “ГУП матырыйаалынан
Женни Стрюкова