Чэпчэтиилээх кирэдьииккэ саха бааһынайдара тиксэллэригэр суол арыллан эрэр...
· - Олох-дьаһах

Чэпчэтиилээх кирэдьииккэ саха бааһынайдара тиксэллэригэр суол арыллан эрэр

Россия бырабыыталыстыбатын дьаһалынан дойду боломуочуйалаах бааннара тыа хаһаайыстыбатын табаарын оҥорооччуларга 5 бырыһыаннаах кирэдьиит биэрэр буолбуттарын туһунан кыһыны-сааһы быһа суруйдубут. Ити эрээри, сылбыт уһугулаабытын, сайыммыт күрэммитин эрэ кэнниттэн Саха сирин олохтоохторун тустарыгар эрэл кыыма кылах гынна.

 edersaas.ru


«Эрэл» ТХПК бэрэссэдээтэлэ Ньургун Гуляев уонна «Россельхозбаан» АУо Саха сиринээҕи салаатын дириэктэрэ Василий Тимофеев

Ол курдук, Нам улууһунааҕы «Эрэл» ТХПК ааспыт бээтинсэҕэ Россельхозбаантан 5 бырыһыаннаах кирэдьиитин харчытын илиитигэр бастакынан тутта. Өрөспүүбүлүкэ тыа хаһаайыстыбатын бородууксуйатын соҕотуопкалыыр, астыыр-үөллүүр тэрилтэлэрин ортолоругар биир бастыҥ үлэлээх кэпэрэтиип бырабылыанньатын бэрэссэдээтэлэ Ньургун Гуляев этэринэн, бэс ыйын бүтүүтүгэр РФ Тыатын хаһаайыстыбатын министиэристибэтин сөбүлэҥин ааһан, онтон кыра иэстээхтэриттэн төлөрүйбүттэрин кэнниттэн 9 мөл. солк. суумалаахха сайаапкалаахтарыттан 4 мөлүйүөнүн биэрбиттэр. Тоҕо диэтэххэ, «Эрэл» ТХПК улахан кирэдьиити ылбытын төлөһө сылдьар. «Чэпчэтиилээх кирэдьиити ыларга салгыы үлэлэһиэхпит, 16 бырыһыаҥҥа киирэрдээҕэр 5 бырыһыаны төлүүр быдан кыра охсуулаах буоллаҕа», – диир Ньургун Феофанович. “Эрэллэр” чэпчэтиилээх кирэдьииттэрин соҕотуопка үлэтин тэрийиигэ туттуохтара уонна эһиил баччаҕа төлөһөн бүтүөхтэрэ.

Иккис сонуммут тыа сирин сүөһүлээх-астаах ыалларын барыларын даҕаны сэргэхситиэн, сэҥээрдиэн сөп. Өрөспүүбүлүкэбит бас билэр соҕотох баана — «Алмаасэргиэнбаан» КБ АУо регион баанын быһыытынан тыа хаһаайыстыбатын чэпчэтиилээх кирэдьиитигэр үлэлэһэр боломуочуйаны ылаары сүүмэрдиир куонкуруска докумуонун туттаран эрэр. РФ бырабыыталыстыбата 2017 сыл от ыйын 24 күнүгэр чэпчэтиилээх кирэдьиити биэрии быраабылатыгар уларытыы, эбии киллэрэр туһунан 875-с №-дээх уурааҕа тахсыбыта. Онно олоҕуран РФ Тыатын хаһаайыстыбатын министиэристибэтэ атырдьах ыйын 4 күнүнээҕи бирикээһинэн боломуочуйалаах бааннары сүүмэрдээһини биллэрдэ.

Саҥа уларытыылаах, эбиилээх быраабылаҕа сурулларынан, эрдэ боломуочуйалаах баан 20 млрд солкуобайтан кырата суох бас билэр үптээх (хапытааллаах) буолуохтааҕа ирдэниллэр эбит буоллаҕына, билигин ол суума 10 млрд солкуобайга диэри аччатыллыбыт, ол иһигэр ирдэбил 10 сылтан итэҕэһэ суох кэм устатыгар АПК тэрилтэлэрин кирэдьииттээһиҥҥэ сыл аайы үлэлэһэр үөрүйэхтээх тэрилтэҕэ 5 млрд солкуобайга диэри, оттон Уһук Илиҥҥи федеральнай уокурук субъектарын сирдэригэр-уоттарыгар регистрацияламмыт бааннарга 3 млрд солкуобайга диэри намтатыллыбыт. Онон «Алмаасэргиэнбаан» КБ АУо боломуочуйа ылар түбэлтэтигэр саха бааһынайдара чэпчэтиилээх кирэдьииккэ кэбэҕэстик тиксиэхтэрэ эрэбил.

СӨ Тыатын хаһаайыстыбатын уонна аһын-үөлүн бэлиитикэтин министиэристибэтин үпкэ департаменын сүрүн исписэлииһэ Герман Николаев этэринэн, ВТБ баан Дьокуускайдааҕы көтөр фабрикатыгар улахан суумалаах кирэдьиити биэрэрэ эмиэ чугаһаан турар. Ол олоххо киирдэҕинэ кылгас болдьохтоох кирэдьииттээһиҥҥэ биһиги өрөспүүбүлүкэбитигэр көрүллүбүт быйылгы  лимиит сабыллар кыахтаах. “Бырагыраама тупсарыллан, көннөрүллэн, кэлэр сылга быйылгытааҕар ньымсатык үлэлиэ дии саныыбын, — диир Герман Герасимович. – Онон, өрөспүүбүлүкэбит бааһынай хаһаайыстыбалара, кэпэрэтииптэрэ чаҕыйбакка, эһиилги чэпчэтиилээх кирэдьиити ылар туһуттан докумуон хомуйан туттарыыга билиҥҥиттэн сүүрүөхтэрин-көтүөхтэрин наада. Сыллааҕы отчуоту кэтэспэккэ, 9 ыйдааҕы түмүктэрин туттардахтарына быдан суһалсыйыа этэ. Бааннар ону ылаллар”.

Василий НИКИФОРОВ, “Саха сирэ” хаһыат, edersaas.ru

 

2
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

13 + десять =