Владивостокка чэпчэки атлетикаҕа чөмпүйэнээт уонна Уһук Илин уокуругар бастыыр иһин күрэхтэһии буолла.
Бу күрэхтэһиигэ Саха сирин спортсменнара үс кыһыл көмүс, үс үрүҥ көмүс мэтээли ылары ситистилэр диэн СИА иһитиннэрэр. Саха сирин сүүмэрдэммит хамаандатыгар Кэбээйи улууһун түөрт күүстээх спортсмена — Трифонов Евгений, Павлов Прокопий, Григорьев Александр уонна Дмитриев Яков бааллар. Спортсменнар барыта алта мэтээли Саха сирин сүүмэрдэммит хамаандатын копилкатыгар аҕаллылар.
«Үрдүгү ыстаныыга иккис миэстэни 2 миэтэрэ көрдөрүүлээх Сангаар оҕо-ыччат спортивнай оскуолатын (ДЮСШ) тириэньэр-преподавателэ Григорьев Александр, бу оскуолаҕа дьарыктанар Трифонов Евгений 800 миэтэрэҕэ сүүрүүгэ кыһыл көмүһү уонна 400 миэтэрэҕэ үрүҥ көмүһү ылла. Дмитриев Яков үстэ төхтүрүйэн ыстаныыга үрүҥ көмүс призер буолла. Чөмпүйэнээт түмүктүүр түһүмэҕинэн 4х400 миэтэрэҕэ эстэпиэтэҕэ быһый атахтаахтар илин-кэлин түһүстүлэр. Манна бу спортивнай оскуолаҕа дьарыктанар быһый атахтаах спортсменнар Павлов Прокопий уонна Трифонов Евгений Саха сирин сүүмэрдэммит хамаандатын кытары кыайыыны ылары ситистилэр. Биһиги Сангаар урбаанньыттарыгар уонна Кэбээйи улууһун дьаһалтатыгар спортсменнарбытын өйөөбүттэригэр дириҥ махталбытын тиэрдэбит«, — диэтэ Сангаар бөһүөлэгин оҕо-ыччат спортивнай оскуолатын (ДЮСШ) дириэктэрэ Антонида Кузенко.
Күүрээннээх күрэхтэһии «Динамо» СК былаһааккатыгар ыытыллыбыт. Тэрийээччилэр Приморье кыраайын чэпчэки атлетикаҕа федерацията, Приморье кыраайын физкултуураҕа, спортка министиэристибэтэ уонна чэпчэки атлетика Бүтүн Арассыыйатааҕы федерацията.
Икки күннээх киэҥ далааһыннаах күрэхтэһиигэ уон эрэгийиэнтэн 400 күүстээх спортсмен күөн көрсүбүт. Манна Приморье, Хабаровскай, Камчатка, Забайкалье кыраайдарыттан, Саха сириттэн, Бурятияттан, ЕАУо, Чукоткаттан, Амур, Сахалин уобаластарыттан кэлэн күрэхтэспиттэр. Бу күрэскэ кыайыы спортсмеҥҥа Бүтүн Арассыыйатааҕы таһымнаах күрэхтэһиигэ кыттарыгар кыаҕы биэрэр.
+1
+1
+1
+1
+1
+1
+1