Чехия биатлонистара Логинов туһунан бөрүкүтэ суох санаалаахтар

2016 сыллаахха допины туттуу иһин икки сезоҥҥа күрэхтэһиигэ кыттар бырааба быһылла сылдьыбыт Александр Логинов Аан дойду кубогын Оберхофтааҕы (Германия) түһүмэҕэр сприҥҥэ кыайыылаах таҕыста уонна эстэпиэтэҕэ Арассыыйа хамаандатын састаабыгар бастакы миэстэни ылла. Итинэн кини билиҥҥитэ уопсай зачекка иккис миэстэҕэ иһэр.

Ситиһиилээҕи хаһан баҕарар ордугурҕааһын батыһар дииллэринии, Чехия биатлониһа Ондржей Моравец бу күннэргэ Idnes.cz сайтка допины туттубут Логиновы убаастаабатын, кинини кытта дорооболоспотун иһитиннэрдэ. Чехия өссө биир биатлониһа Михал Крчмарж Логинов курдук киһини ытыктыыр уустук диэн этэн турар.

Бу иннинэ олимпийскай чөмпүйүөн Мартен Фуркад Арассыыйа биатлониһын, допины туттубутун иһин бырастыы гынарга көрдөспөтөҕүн иһин, ытыктаабаппын диэбитэ. 

Роман ПОПОВ, «Саха сирэ» хаһыат, edersaas.ru

Хаартыска интэриниэттэн ылылынна