“Саха сиригэр оҥоһулунна” диэн бырайыак сүнньүнэн маннык ис хоһоонноох тэрээһин бэҕэһээ киэһэ “Тото-хана” эрэстэрээҥҥэ ыытылынна. Ыҥырыылаах ыалдьыттар саха бэйэлээх төрүт чэйин сэргэ олохтоох бородууксуйаны оҥорооччулар барыанньаларын, сироптарын уонна мүөттэрин амсайдылар.
Сонун дьаһалы “Ыалдьытымсах буолуу ассоциацията” өрөспүүбүлүкэ ресторатордарын, отельердарын уонна туризм түмсүүтэ (бэрэссэдээтэл Татьяна Тымырова), Тыа хаһаайыстыбатын уонна ас-үөл бэлиитикэтин министиэристибэтин астыыр-таҥастыыр салааҕа департамена (салайааччы Василий Афанасьев) тэрийбиттэр. Татьяна Александровна аан тылыгар киин куорат эрэстэрээннэриттэн билиҥҥитэ 5-6 тэрилтэ Саха сиригэр оҥоһуллан тахсар кучу оттон чэйи, отон сиробун, тигээйи мүөтүн тутталларын, өссө кэҥэтэр, тарҕатар инниттэн маннык көрдөрөр-биллэрэр тэрээһини ыытар туһалаах эрэ буолуоҕун эттэ.
Оттон Василий Владимирович: “Саха сиригэр оҥоһулунна” бырайыагы быйыл сайын маҕаһыыннартан саҕалаабыт буоллахпытына, аны иккис түһүмэҕинэн эрэстэрээннэргэ, кафеларга киирдибит. Бэйэбит дойдубутугар үүнэр сир аһа ситэ сыаналана илик. Дьиҥэр, үчүгэйдик ылыстахха, барыстаах бизнес буолара биллэр. Ол иһин бүгүн Дьокуускай эрэстэрээннэрин салайааччыларын анаан-минээн ыҥырдыбыт. Аны кыһын эт-балык бүлүүдэлэргэ аналлаах өссө биир улахан көрдөрөр-биллэрэр дьаһалы ыытарга былаанныыбыт,” – диэтэ.
Саха сирин эмтээх үүнээйилэрин үөрэтэр-чинчийэр учуонай Варвара Семенова бэйэ сиригэр-уотугар үүнэр от-мас киһи этигэр-хааныгар туһатын, хайа даҕаны эми, битэмиини солбуйар күүстээҕин кэпсээн-билиһиннэрэн туран, эрэстэрээннэр, кафелар салайааччыларын, үлэһиттэрин иннилэригэр нацияны чэбдигирдэр улахан сорук турарын санатта.
Бу дьоро киэһэ урбаанньыт Ньургуйаана Заморщикова “Саха Чэй” дьоҕус тэрилтэтэ, тигээйи мүөтүнэн идэтийэн дьарыктанар Анатолий Гаевой, “Тирэх” ТХПК, “Саха сирин отонноро” уонна “Сахаконсервпродукт” ХЭУо-лар бэйэлэрин бородууксуйаларын билиһиннэрдилэр, амсаттылар. “Махтал” эрэстэрээн асчыт кыргыттара кучу окко дьэдьэн, моонньоҕон сэбирдэхтэрин, дөлүһүөнү, отону эбэн булкуйан, дьикти минньигэс, эгэлгэ амтаннаах чэйинэн ыалдьыттары күндүлээтилэр. Ити курдук саха чэйин утахтара ханыар диэри тото-хана иһэн тарҕастылар.
Василий НИКИФОРОВ, edersaas.ru