Саха сирин күндү олохтоохторо! Саха сирин өрөспүүбүлүкэтин салалтатын аатыттан уонна тус бэйэм ааппыттан эһигини барыгытын ис сүрэхпиттэн Чэгиэн турук күнүнэн эҕэрдэлиибин!
Өрөспүүбүлүкэ бастакы бэрэсидьиэнэ Михаил Ефимович Николаев ыйааҕынан биһиги 2000 сыллаахтан ыла олунньу бүтэһигэр бу күнү бэлиэтиибит. Бу ыйга сыл аайы мэдиссиинэ тэрилтэлэригэр аһаҕас аан күннэрэ ыытыллаллар, дьаарбаҥкалар тэриллэллэр, доруобуйаны чэбдигирдиигэ анаммыт тэрээһиннэр тэриллэллэр.
Доруобуйаҕа, чэгиэн буолууга туһуланар дэкээдэ хоруона хамсыгыттан сылтаан, уустук усулуобуйаҕа ааһан эрэр. Ол гынан баран, биһиги бу уустук кэмҥэ олох-дьаһах өрүттэрин саҥалыы көрдүбүт, киһиэхэ туох ордук күндү буоларын өйдөөтүбүт, бэйэбит доруобуйабытын, аймахтарбытын, чугас дьоммутун харыстыырга үөрэннибит. Ол иһин, бу үүммүт сылы биһиги Чэбдигирии сылынан биллэрдибит. Оттон доруобуйа, чэгиэн турук күнүгэр анаммыт дэкээдэ уһаан биэрдэ.
Өрөспүүбүлүкэ олохтоохторун доруобуйаларын тупсарыыга, чэбдигирдиигэ улахан болҕомтобутун уурабыт. Улахан үбү, күүһү-уоҕу доруобуйа харыстабылын тутууларыгар аныыбыт. Бүгүн Дьокуускайга онкологическай диспансер, сүрэх, тымыр ыарыыларын эмтиир киин тутулла тураллар. Улуустарга саҥа биэссэр-акушер пууннара арыллаллар, балыыһалар саҥардыллаллар, аныгы тэриллэр ылыллаллар. Бүгүн биһиги дьоҥҥо көмөлөһөр быраастарбытыгар, эмп үлэһиттэригэр махталбытын тиэрдэбит. Үрүҥ халааттаах аанньалларбыт хаһан баҕарар көмөҕө кэлэргэ, эмсэҕэлээбит, мөлтөөбүт дьону быыһыырга, атахтарыгар туруорарга бэлэмнэр. Ол гынан баран, үгүс ыарыыны чөл олоҕу тутуһан, сорох аахайбатах судургу быраабылалары тутуһан тумнуохха сөп.
Үөскээбит үтүө үгэстэрбит биһиги күннээҕи олохпут быстыспат аргыстара буолалларыгар эрэнэбин. Олунньуга ыытыллар тэрээһиннэр өр салҕаналлара олус үчүгэй буолуо этэ. Чөл олох, үтүө быһыы-майгы куруутун баар буоллунар.
Бу үтүө күҥҥэ барыгытыгар сырдык санааны, дьолу уонна кытаанах доруобуйаны баҕарабын! Дьиэҕитигэр өйдөһүү, ил олохсуйдун, бары кыһалҕаларгыт кыһын бүтэһик күнүн кытта араҕан-ааһан хааллыннар!
Өрөспүүбүлүкэ Ил Дархана Айсен Николаев