Өрөспүүбүлүкэҕэ мэдиссиинэ тэрилтэлэрэ бары кэриэтэ ыарыһахтары былааннаан көрүүлэрэ атырдьах ыйын 27 күнүттэн саҕаламмыта. Билиҥҥи туругунан, коронавирус тарҕаммыт улуустарыгар эрэ үлэлээбэттэр. Ол курдук, Мииринэй, Нерюнгри, Өлөөн оройуоннарыгар балыыһалар, поликлиникалар пациеннарга анаан үлэлии иликтэр.
edersaas.ru
Атын улуустарга, куораттарга былааннаах көрүүлэри саҕалаатылар. Бырааска көрдөрөр инниттэн, регистратураҕа эрийэн, суруйтаран эрэ баран, поликлиникаҕа тиийиэхтээххит. Быраас салгыы анаалыс туттарарга, атын исписэлиискэ ыытыан сөп.
Бэйэни хааччахтанан олоруу кэмигэр балыыһалар, поликлиникалар үлэлээбэккэлэр, дьон эрэйи көрдө. Төһө да дьиэҕэ олорбут иһин, син биир олохсуйбут ыарыылаах дьон ыарыылара бэргиэн, тиис, кулгаас ыалдьыан, тирии бааһыарыан сөп буоллаҕа.
Онон, билиҥҥи кэмҥэ быраастар хайдах үлэлииллэрин билээри, эрийэн ыйыталастыбыт.
Тиис ыарыйдаҕына…
Тииһим пломбата түһэн хаалбытыгар, харантыын буолан, кыайан оҥорторбокко сылдьыбытым. Онтум, дьэ, биир үтүө күн ыалдьан киирэн барбата дуо? Саатар, өрөбүл күн буолан биэрдэ.
Федор Попов уулуссатыгар турар куораттааҕы стоматологическай киин ОМС полиһынан босхо көрөр, эмтиир. Балаҕан ыйын саҥатыгар үлэтин саҕалаата, бириэмэтин суруйтаран баран, тиийэн тииһи эмтэтиэххэ сөп. Манна диэн эттэххэ, бэйэни хааччахтаныы кэмигэр дьуһуурунай кэбиниэт үлэлээбитэ. Ол эбэтэр, тиистэрэ ыалдьыбыт дьон тиийэн, эмтэнэр кыахтаах этилэр.
Киин субуотаҕа, баскыһыанньаҕа сарсыарда 9 чаастан күнүс 3 чааска диэри үлэлиир эбит. Тииһиҥ ыалдьан тиийбит буоллаххына, эрдэттэн суруйтарыы ирдэммэт. Онон быһалыы регистратураҕа киирдим. Көрүдүөргэ киһи суох. Полиспын, пааспарбын көрөн баран, үгүс ыйытыыта суох, тута кэбиниэккэ ыыттылар.
Тииһим дьөлөҕөһө улахан уонна миилэм испит буолан, быраас ыраастаан, эмп уган баран, быстах пломбаны туруорда, рентгеҥҥэ анаата. Биир нэдиэлэнэн кэлэн, быстах пломбаны ылларыахтаахпын уонна стоматологка суруйтаран, эмтэтиэхтээхпин.
Регистратураҕа быһаарбыттарынан, билигин стоматология киинигэр урукку курдук сарсыарда кэлэн, уочараттаан туран, толуону ылбат эбиккин. Куорат олохтоохторо кыһыннары-сайыннары сарсыарда эрдэттэн, сороҕор түүннэри кэлэн уочараттаан, босхо толуоннары ылалларын өйдүүр буолуохтаахтар.
Билигин толуоннары er14.ru саайт эрэ нөҥүө сарсыарда 8 аҥаар чаастан 9-ка эрэ диэри ылыахха сөп эбит. Эмиэ даҕаны, үчүгэй курдук эбит, дьиэҕэр олорон, толуоҥҥа тиксэн хааларыҥ… Арай, саайтка киирэн, поликлиникабын көрдөөбүтүм, gosuslugi.ru порталынан эрэ суруйтарыахха сөп буолан таҕыста. Өлүү түбэлтэлээх, ол портал паролун умнан кэбиспиппин. Хаһан пароль бөҕөтүн суруйан боруобалаан, тиһэҕэр, саҥа пароль туруортаран, киирэн көрүөхпэр диэри, 9 чаас буолан хаалбыт. Онон, мэлийдэҕим ол.
Дьэ, оччотугар, интэриниэти үчүгэйдик билбэт, төлөбүрдээх стоматологтарга сылдьар кыахтара суох саастаах дьон хайдах суруйтараллар? Регистратураҕа быһаарбыттарынан, оҕолоро, сиэннэрэ көмөлөһүөхтээхтэр эбит. “Олох кыаллыбатаҕына, 8 чааска биһиэхэ кэллиннэр, биһиги саайт нөҥүө толуон ыларга көмөлөһүөхпүт”, — диэн регистратура кыыһа быһаарда.
Көрүдүөргэ бириэмэлэрин кэтэһэн олорор дьон син бааллар. Бары кэриэтэ мааскалаахтар, бахилалаахтар. Киирэр ааҥҥа илиини ыраастыыр дезинфектор, сэрэтэр суруктар бааллар.
Стоматология киинэ сарсыарда 8-тан киэһэ 7 чааска диэри үлэлиир, эрдэттэн толуон ылан, онно ыйыллыбыт чааска кэлиэхтээххин. Өрөбүллэргэ 9-тан 3 чааска диэри тиистэрэ ыалдьыбыт дьону көрөллөр, эмтииллэр. Регистратура төлөпүөнэ: 21-01-76. Оҕо регистратурата: 21-01-70
Электроннай регистратура
Хас балыыһа, поликлиника аанын ахсын бырааска хайдах суруйтарар туһунан биллэриилэр ыйанан туралларын көрбүт буолуохтааххыт. Онно “Электронная регистратура” сыһыарыыны хачайдаан, бырааска суруйтарыҥ диэн баар.
Андроид “маҕаһыыныгар” бу сыһыарыыны хачайдаабыт дьон тугу суруйбуттарын көрбүтүм, астыммыт киһи аҕыйах эбит. “Улуустар эрэ балыыһаларын көрдөрөр, киһи сатаан суруйтарбат” эҥин диэн ис хоһоонноох суруктар элбэхтэр.
Бу сыһыарыыны хачайдаан да баран, булан суруйтарбатым. Эмиэ “Госуслуги” паролун көрдөөтө, урукку парольбун билиммэтэ. Онон, чэ, ыксал буоллаҕына, электроннай көрүҥүнэн суруйтарыы сатаабат дьоҥҥо эрэйдээх соҕус буолар эбит.
Харах балыыһата үлэлээбэт
Офтальмологическай балыыһа Свердлов уулуссатыгар баар. Регистратураҕа эрийэн ыйыппыппытыгар, былааннаах көрүү суох, балыыһа үлэлээбэт, харахтара ыалдьыбыт, оһолломмут дьоҥҥо суһал көмө кэбиниэтэ Стадухин уулуссатын 84 №-гэр күнүстэри-түүннэри үлэлиир диэн эттилэр.
Бэйэни хааччахтаныы эрэсиимэ уһаабытынан, сытар балыыһаҕа эмиэ суһаллык көмөҕө наадыйар дьону эрэ эппэрээссийэлииллэр, укуоллууллар. Былааннаммыт эппэрээссийэлэр оҥоһуллубаттар.
Регистратура нүөмэрэ: 22-53-57, 8961-869-4343.
Поликлиникалар исписэлиистэрэ үлэлииллэр дуо?
Дьокуускайдааҕы мэдиссиинэ киинигэр терапевтарга, педиатрдарга уонна маннык исписэлиистэргэ: офтальмологка, кардиологка, эндокринологка, неврологка, отоларингологка, хирурга, урологка эрдэттэн суруйтаран, көрдөрүнүөххэ сөп.
Колл-киин төлөпүөнүгэр 500-003 нүөмэргэ киһи кыайан эрийэн тиийбэт эбит. Хас да мүнүүтэ эрийэн көрдүм да, төлө биэрэ турар. Ол эрээри, киин саайта атын балыыһалар саайтарынааҕар саамай үчүгэйдик үлэлиир эбит диэн көрдүм: күн аайы саҥардыллар, быраастар эрэсиимнэрэ, үлэлиир чаастара суруллар, ким көрөрө, ким уоппускаҕа барбыта ырылхайдык көстөр. Саайт тас көстүүтэ, ис тутула өйдөнүмтүө, киирэргэ-тахсарга да түргэн, табыгастаах. Холобур, саайтка суруйан, бырааһы дьиэҕэ ыҥырыахха, диспансеризацияҕа суруйтарыахха сөп эбит.
3-№-дээх куорат балыыһата (3-с поликлиника) сарсыарда 8-тан киэһэ 8 чааска диэри, өрөбүл күннэргэ 9-тан 3 чааска диэри үлэлиир.
Балаҕан ыйын 7 күнүнээҕи туругунан, терапевтары, педиатрдары сэргэ, невролог, эндокринолог, кардиолог, гастроэнеролог, инфекционист, хирург, оториноларинголог, офтальмолог үлэлииллэр. Өрөбүл күннэргэ дьуһуурунай терапевка уонна педиатрга көрдөрүөххэ сөп. Бу поликлиника саайта эмиэ үчүгэй эбит, быраастар үлэлиир бириэмэлэрин көрүөххэ сөп.
1-кы №—дээх поликлиникаҕа 5 терапевт, акушер-гинекологтар, гастроэнтеролог, инфекционист, невролог, онколог, оториноларинголог, офтальмолог, педиатрдар, пульмонолог, стоматолог, травматолог-ортопедтар, уролог, эндокринолог, хирург, УЗИ, функциональнай диагностика кэбиниэттэрэ үлэлииллэр.
Онон, бырааска көрдөрөр кыһалҕа тирээн кэллэҕинэ, уһата-кэҥэтэ сылдьыбакка, эрдэттэн суруйтаран баран, көрдөрүөххүтүн сөп. Поликлиникалар саайтарыгар киирэн, күннээҕи эрэсиими билэн-көрөн баран, суруйтарар ордук эбит.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн уонна ааптар түһэриитэ.