Иэхэйбин! Дьэ, доҕоттор, туох да диэҥ, элбэх сиэни ииппэхтээбит эмээхсин быйыл мин үөрүүм үксээтэ. Эбии сиэн кэлэн даҕаны, ону кытта эрдэттэн, сиэним ахсын илиибинэн таҥан, ол-бу кыраасканан киэргэтэн альбом оҥорор дьарыкпын тохтотор буоллум. Ону солбуйар ньыманы “Айар” кинигэ кыһата булбут!
“Чээтиин!” диэн суруйан толорон баран, бэлэм тиһилигинэн хомуйан, үйэ тухары өйдөбүнньүк кинигэ оҥорор албастаах уонна алгыстаах хаартачыкалары бу илиибэр тутан олоробун.
“Аатым миэнэ” маннык диэнтэн саҕалаан, оҕо төрөөтүн кытта ыйааһына, үрдүгэ, күнү көрбүт чааһа ыйыллыаҕыттан, 12 ый тухары күннэтэ кэриэтэ ситиһиитин бэлиэтиир, хаартысканан ситэрэр талба хаартачыка кэчигирэһэр. “Маҥнайгы тииһим”, “Маҥнайгы баттаҕым”, “Маҥнайгы тылым”, “Аан бастакы Саҥа дьылым” эҥин диэни урут бэйэм дьүһүйэн бооччойо сатыырбын бэрт кэбэҕэстик, киһи көрөн манньыйыахтык оҥорбуттара баҕас үчүгэйкээнин.
Махтал тылбын этэ таарыйа “Айардары” ааһан иһэн хайгыым. Бу олус үчүгэй сыһыан. Оҕо ийэтин киэлититтэн тахсыаҕыттан олоҕун болҕойор, сүрүннүүр, итигирдик ааҕа сайыннарар сиэр омукка булгуччу баар буолуохтаах. Ону олус сөпкө таба тайаммыккытыгар үрдүк үөрүүбүн иһитиннэрэбин.
Ити дьоҕус да, сыаналаах, дьиэ аайы туһалаах, бэйэҕит ситэрэн оҥорор оҕо кинигэтин сэҥээриҥ. Барытын толорон баран холбуу тутаҕын уонна хам ытыттараҕын. Онуоха ол сөкүлүөпкэтэ кытта иһигэр угулла сылдьар.
«Саха сирэ», edersaas.ru саайтка анаан Майя ГЕРАСИМОВА