Ахсынньы 1 күнүттэн Чечняҕа арыгы маҕаһыыннара бары сабылыннылар диэн сурах кэллэ.
Бу сурах сымыйа дуу, чахчы дуу? Федеральнай сайтар бу сураҕы бигэргэтэллэр. “РИА-Новости” сайтыгар бүгүн тахсыбыт.
Бүтүн өрөспүүбүлүкэ үрдүнэн арыгыны атыылыыр баара-суоҕа 20 маҕаһыын баара үһү. Ону да сарсыарда 8-тан 10 чааска диэри, икки эрэ чаас устата атыылыыллара. Кэнники сылларга арыгы атыытын аҕыйатарга үлэ ыытыллар эбит. Мусульманнар бэйэлэрэ да арыгыны испэттэрэ биллэр.
Соторутааҕыта Чечняҕа “Кавказ” трассаҕа массыыналар харсыһан, улахан саахалга 7 киһи, ол иһигэр 2 оҕо, суорума суолламмыта, өссө 2 икки киһи ыарахан туруктаах. Бу саахал тахсарыгар арыгы испит киһи, “Форд” массыына ыытааччыта Алам Ходжаев буруйдаах этэ. 2016 сыл саҥатыттан Чечня Өрөспүүбүлүкэтигэр суолга 343 саахал тахсан, 100-тэн тахса киһи тыына быстыбыта. Манна барыта 317 тыһ. массыына баара бэлиэтэммит.
Чечня парламенын бэрэссэдээтэлэ, суолга саахалы туоратарга оперативнай ыстаап салайааччыта Магомед Даудов иһитиннэрбитинэн, бу саахал кэнниттэн биир да арыгыны атыылыыр маҕаһыын суох буолбут. Предпринимателлэр бэйэлэрэ баҕа өттүлэринэн, маҕаһыыннарын саппыттар. Кинилэргэ бизнес атын көрүҥүн саҕалыылларыгар көмөлөһүөх буолбуттар.
Оттон аҕа баһылыктара Рамзан Кадыров буруйдааҕы ыар накаастабыл күүтэр диэн иһитиннэрдэ. Сураҕа, Ходжаев аймахтара бары суһал соҕустук дойдуларыттан тэскилээбиттэр үһү…
Ангелина ВАСИЛЬЕВА.