Кэрэчээн бэйэлээх омук кыыһа «Бэстээхпин таптыыбын…» диэн уу сахалыы тылынан ыллыыр ырыатын килиибин көрбүт эрэ киһи кутун туттарар, санаалыын сырдыыр, кэрэҕэ тардыһар.
edersaas.ru
Лариса Тимаева төрөппүттэрэ 80-c сылларга Грознай куораттан көһөн кэлэн, Аллараа Бэстээххэ олохсуйбуттар. Манна кэлэн алта оҕоломмуттар. Лариса төрөөбүт түөлбэтин саҕа бу Орто дойдуга күндүтүк саныыра суох. Кини сахалыы хайдах маннык үчүгэйдик билэрин ыйыппыппар, сэһэргэһээччим бу курдук хоруйдаата:
— Мин кылааһым оҕолоро үксэ сахалар. Быйыл онус кылааһы бүтэрдим. Саха тылын уруогун наһаа үчүгэй учуутал үөрэтэр. Саргылаана Николаевна миэхэ саха тылыгар интэриэһи үөскэтэн, бу саамай сөбүлүүр уруогум. Ырыабын үөрэтэрбэр ыарырҕаппатаҕым. Түөрт күн иһигэр бэлэмнээн, бу ырыаны аан бастаан Сомоҕолоһуу күнүгэр сүрэхтээбиппит. Онтон быйыл оскуоланы бүтэрээччилэргэ анаан килиип устубуппут.
Чечен омук кыысчаана мантан инньэ сахалыы ырыалары ыллыан баҕарар. «Наһаа нарын мелодиялаахтар, Ийэ дойдуга тапталы иҥэрэр ис хоһоонноох буолан, мин дууһабар ордук чугастар», — диэн санаатын үллэстэр. Лариса эһиил үөрэҕин бүтэрдэҕинэ, ХИФУ-га мэдиссиинэ институтугар туттарсар баҕалаах.
— Төрөөбүт Сахам сириттэн ыраатыахпын баҕарбаппын. Манна мин чугас дьонум, доҕотторум бааллар. Киһи талаанын сайыннарар Аллараа Бэстээхтээҕи Култуура дьиэтэ – мин иккис дьиэм. Ыллыырбын, тыйаатыр устуудьуйатыгар дьарыктанарбын олус сөбүлүүбүн, — диир Лариса Тимаева.
Елена ПОТОЦКАЯ, «Саха сирэ» хаһыат, edersaas.ru