Бу күннэргэ Өймөкөөн улууһун Төрүт нэһилиэгэр улуустааҕы киин балыыһа кылаабынай бырааһа Ираида Харлампьева көҕүлээһининэн оройуон сүрүн тэрилтэлэрин, ол иһигэр үөрэх уонна нэһилиэнньэ социальнай көмүскэлин управлениеларын салайааччылара кэлэн бардылар.
Үөрэх управлениетын начальнига Дина Фасхутдинова үөрэх тэрилтэлэрин «оптимизациялааһын» кэнниттэн саҥа статуһунан үлэлии олорор Төрүт орто оскуолатын уонна оҕо саадын үлэлэрин көрдө-иһиттэ. Орто оскуола баазатыгар «Точка роста» бырайыак үлэҕэ киирэринэн сибээстээн, икки кэбиниэт аныгы технология ирдэбилинэн өрөмүөннэнэрин иһитиннэрдэ. Социальнай көмүскэл управлениетын салайааччыта Прасковья Аммосова нэһилиэнньэҕэ көрүллэр социальнай чэпчэтиилэри билиһиннэрдэ. Улуустааҕы киин балыыһа кылаабынай бырааһа Ираида Харлампьева оройуоҥҥа сыстыганнаах дьаҥ пандемиятын бүгүҥҥү туругун билиһиннэрдэ.
— Күүстээх эмчиттэрдээх уонна уустук кэмҥэ бэйэ-бэйэни өйөһөр кэлэктииптээх буолан, биһиги пандемия саамай тыҥааһыннаах кэмин этэҥҥэ аһардыбыт, — диэн эттэ. Түгэнинэн туһанан, Төрүт балыыһатын медицинскэй үлэһиттэригэр Христина Неустроеваҕа уонна Анфиса Кривошапкинаҕа пандемия саамай тыҥаан турар кэмигэр оройуон балыыһатыгар тиийэн, биир идэлээхтэрин өйөөбүттэригэр барҕа махталын тиэртэ.
— Төрүт балыыһатыгар кылаабынай бырааһы көрдүүбүт да, билиҥҥитэ була иликпит. «Земскэй доктор» бырайыагынан хирург уонна педиатр быраастар киин балыыһаҕа үлэлии кэллилэр. Онон икки хирург уонна икки педиатр быраастанныбыт. Каадырдары көрдүүр үлэни утумнаахтык тэрийэбит, — диэн Ираида Харлампьева салгыы кэпсээтэ.
Кэпсэтии сүнньүнэн олохтоохтору эминэн хааччыйыы боппуруостарын ырыттылар, вацинацияны ыытыыны дьүүллэстилэр. Мунньах түмүгэр бу күннэргэ сайаапканан киин балыыһаттан исписэлиис кэлэн, ИФА анаалыһын ылыаҕа. Нэһилиэк дьокутаата Октябрина Столярчик олохтоохтор ааттарыттан кылаабынай быраас Ираида Харлампьеваҕа истиҥ махталын тиэртэ: «Эн төрөөбүт Өймөкөөҥҥөр үлэлии кэлиэххиттэн, Ираида Ивановна, Төрүккэ хайа да сыллааҕар болҕомто уурулунна. Улууспутугар эмчиттэр биригээдэлэрэ, ол иһигэр киин куораттан тиийэ, чаастатык көрөн-истэн барар буоллулар. Бэйэбит кыыспыт, улуустааҕы поликлиника профпатолог бырааһа Валентина Кондакова тус өрөбүллэригэр кэлэн, биир дойдулаахтарын көрөн-истэн барар. Ол да иһин сыстыганнаах дьаҥ саҕана бэрт өр кэмҥэ диэри Төрүт саамай «ыраас нэһилиэгинэн» ааҕыллар этэ. Сыстыганнаах дьаҥҥа сутуллубут бастакы ыарыһахтар сэтинньигэ эрэ бэлиэтэммиттэрэ. Бу барыта сарбыллыы кэмигэр бырааспытын суохтаппатах эмчиппит Валентина Кондакова үтүөтэ диэн сыаналыыбыт. Валентина Афанасьевна анаалыстары суһаллык ыллаттаран, ыалдьыбыттары улуус киинигэр ыытар дьаһалы ылан, «скорайы» ыҥыттара охсон, үгүс дьон ыарыылара киэҥник тарҕаммакка, атахтарыгар түргэнник турдулар. Аны быйылгы сыл саҕаланыытыгар, Ираида Ивановна, эн тус бэйэҕинэн көҕүлээн, олохпутун-дьаһахпытын билсэн бардыгыт. Махтал буоллун эһиэхэ, үрүҥ халааттаах дьоммутугар», — диэн эттэ олохтоох дьокутаат Октябрина Столярчик.
Саамай тирээн турар боппуруоһунан айан суола буолла.
— «Халыма» федеральнай суолтан Төрүккэ айанныыр кыһыҥҥы суол үгүс сиринэн алдьаныылаах буолан, ыарыһахтары таһар «Суһал массыына» көлөтө суолга туран хаалыан сөп. Эбэтэр нэксиэлээх суолга ыарыһах тыына быстан, кинини «сүтэрэн» кэбиһиэхпитин сөп. Онон суолгут өрөмүөнүн хайаан да туруорсуҥ, — диэн эттэ улуустааҕы киин балыыһа кылаабынай бырааһа Ираида Харлампьева. Доруобуйа харыстабылын сылыгар эмчиттэр көҕүлээһиннэринэн улуус салайааччыларыттан турар бастакы оробуочай дэсээн атыттарга суолу арыйда. Бэртээхэй холобур батыһыннарыылаах буоллун!
Елена ПОТОЦКАЯ, «Саха сирэ» хаһыат, edersaas.ru