Уус Алдан олохтоохторугар умнуллубат бэлиэ күн үүннэ Бүгүн, от ыйын 8 күнүгэр, Чараҥ сэлиэнньэтигэр үөрүүлээх быһыыга-майгыга «Нэлээн» диэн саҥа ипподром аһыллыытын сиэрэ-туома ыытыллыа.
Бу «Мин Сахам сирэ ХХI үйэҕэ» өрөспүүбүлүкэтээҕи үтүө дьыала хамсааһынын чэрчитинэн тутулунна. Тутууга өрөспүүбүлүкэ, улуус, нэһилиэк бүддьүөттэриттэн үп көрүллүбүт. Ону таһынан, Чараҥ сэлиэнньэтин олохтоохторо, тыа хаһаайыстыбатын управлениетын уонна улуус ТХПК үлэһиттэрэ субуотунньуктары тэрийбиттэр.
Ипподром эргимтэтэ – 1600 миэтэрэ, манна 1024 миэстэлээх, сыаналаах, икки мэндиэмэннээх көрөр сирдээх, 20 аты киллэрэн туруорар анал сир оҥоһуллубут.
СӨ Ил Дархана Айсен Николаев ат спордун сайдыытыгар, өрөспүүбүлүкэҕэ сүүрүк сылгылары элбэтиигэ үлэлэһэр, сылгы иитиитинэн дьарыктанар дьоҥҥо улахан болҕомтотун уурар. Сыл ахсын өрөспүүбүлүкэҕэ Ил Дархан бирииһигэр, ону сэргэ, СӨ Бырабыыталыстыбатын Бэрэссэдээтэлин бирииһигэр ат сүүрдүүлэрэ өрө көтөҕүллүүлээхтик ыытыллаллар.
Бүгүн Уус Алдан улууһун саҥа ипподромугар Саха АССР тэриллибитэ 100 сылынан уонна СӨ норуоттарын VIII спортивнай оонньууларын чэрчитинэн, Уус Алдан улууһун баһылыгын бирииһигэр ат сүүрдүүтүгэр күрэхтэһии ыытыллар.
Алта сүүрүү буолуоҕа. Түөрдүттэн уонна онтон улахан ыраас хааннаах боруода аттар 1600 м дистанцияҕа Уус Алдан улууһун баһылыгын бирииһигэр сүүрүөхтэрэ. Ону таһынан, өрөспүүбүлүкэҕэ төрөөбүт ыраас хааннаах иккилээх аттарга, түөртээх уонна онтон улахан саастаах тупсарыллыбыт хааннаах саха сылгыларыгар, Уус Алдан улууһун хаһаайыстыбаларыгар түөрт уонна онтон улахан саастаах саха аттарыгар, үстээх ыраас хааннаах боруода уонна эмиэ итиччэ саастаах тупсарыллыбыт хааннаах саха сылгыларыгар сүүрүүлэр буолуохтара. Бу сүүрдүүлэр Ат спордун энтузиаст-пропагандиһа, Уус Алдан улууһугар ат спордун федерациятын бэрэссэдээтэлэ Константин Мигалкин бирииһиигэр, САССР «Лена» сопхуоһун үтүөлээх сылгы иитээччитэ Афанасий Артамонов аатынан бириискэ ыытыллаллар.
«Нэлээн» ипподрому арыйыы үөрүүлээх чааһыгар уонна ат сүүрдүүтүгэр СӨ Ил Түмэнин Бэрэссэдээтэлин бастакы солбуйааччы Александр Жирков, СӨ Бырабыыталыстыбатын Бэрэссэдээтэлин солбуйааччы, тэрийэр кэмитиэт бэрэссэдээтэлэ Сергей Местников, СӨ Успуорка уонна физкултуураҕа миниистир Леонид Спиридонов, Уус Алдан улууһун баһылыга Алексей Федотов, СӨ ат успуордун федерациятын салайар Руслан Федотов сылдьыахтара.