Бэҕэһээ Дмитрий Коркин турнирыгар 57, 65, 74, 86 уонна 97 киилэҕэ диэри ыйааһыннарга кыайыылааҕы быһаарар түмүк хапсыһыылар буоллулар.
Арассыыйа үс төгүллээх призера Арыйаан Тютрин бу иннинээҕи турнирдарга ылбыт икки боруонсатыгар үбүлүөйдээх түһүлгэ кыһыл көмүс мэтээлин эбиннэ. Кини 57 киилэлээхтэргэ финалга эдэрдэргэ Европа күрэҕин чөмпүйүөнүн Парвиз Ибрагимовы (Азербайджан) 3:0 ахсаанынан баһыйа тутта. Итинэн Арыйаан норуоттар икки ардыларынааҕы кылаастаах спорт маастарын нуорматын толордо. Бу ыйааһыҥҥа Тамир Гармаев (Бурятия), Димчик Ринчинов (Белоруссия) үһүс буоллулар.
65 киилэлээхтэргэ сүүмэрдэммит хамаандабыт хапытаана Виктор Рассадин 2014, 2015 уонна 2017 сыллардааҕы ситиһиилэрин хатылаан, Дмитрий Коркин турнирын түөрт төгүллээх кыайыылааҕынан буолары ситистэ. Түмүк хапсыһыыга Виктор «Тахти Кубога», «Роман Дмитриев» норуоттар икки ардыларынааҕы турнирдар чөмпүйүөннэрин Тумур Очир Тулганы (Монголия) кыайда — 4:2. Алексей Боровицкай (Бурятия), Даулет Ниязбеков (Казахстан) боруонса мэтээллэри ыллылар.
Оттон 74 киилэҕэ диэри ыйааһыҥҥа Франк Чамизо бэҕэһээ «Триумф» СК көбүөрүгэр хотторуу хомолтотун биллэ. Хара ааныттан киимиилээхтик киирсибит Никита Сучков (Красноярскай) Италия ааттаах-суоллаах бөҕөһүттэн хапсыһыы тиһэх сөкүүндэлэригэр кыайыыны ыһыгыннарда. Бу ыйааһыҥҥа Гаджимурат Омаров (Азербайджан), Исраил Касумов (Красноярскай) үһүс бириистээх миэстэлэри ыллылар.
86 киилэҕэ диэри ыйааһыҥҥа Иран эдэр бөҕөһө Ахмад Базригалех кыайыылаах буолла. Арсенали Мусалалиев (Дагестан) — иккис, Сослан Кцоев (Алания), Уйтумен Оргодол (Монголия) үһүс буоллулар.
97 киилэлээхтэргэ Нурмагомед Гаджиев (Азербайджан) түмүк хапсыһыыга Батзул Улзийсайханы (Монголия) хотон бастаата. Красноярскай тустууга оскуолатын иитиллээччилэрэ Игорь Овсянников уонна Юрий Белоновскай боруонса мэтээллэринэн наҕараадаланнылар.
Роман Попов, edersaas.ru
Ааптар хаартыскаҕа түһэриитэ