Амма улууһун Чакыр нэһилиэгин хаһаайыстыбалара сүөһүлэрин-сылгыларын куһаҕана суох кыстаттылар.
edersaas.ru.
Олохтоох дьаһалта баһылыга Прокопий Прокопьев иһитиннэрбитинэн, нэһилиэк үрдүнэн 1114 ынах сүөһү итиэннэ 500 сылгы баар. Хороҕор муостааҕы уонна сыспай сиэллээҕи иитиигэ «Кэскил» хааччахтаммыт эппиэтинэстээх уопсастыбаны таһынан уонча бааһынай хаһаайыстыбата уонна чааһынай ыаллар идэтийэллэр. Лев Прокопьев, Гаврил Нерлов, Евгений Ефремов салайар бааһынай хаһаайыстыбалара, чааһынай ыаллартан Айаал Ефремов, Николай Алексеев, Гаврил Нерлов, Давид Алексеев ордук элбэх сылгылаахтар.
Олохтоохтор тыа хаһаайыстыбатын министиэристибэтин иһинэн үлэлиир федеральнай бырагыраамаларга көхтөөхтүк кытталлар. Ол курдук, «Бааһынай хаһаайыстыба базатыгар дьиэ кэргэн пиэрмэтин тэрийии» бырагырааманан Юрий Прокопьев, «Саҕалааччы бааһынай» бырагырааманан Давид Алексеев, Николай Соловьев, Гаврил Нерлов, Николай Кириллин, сылгы базатын тутуу бырагырааматынан Евгений Ефремов, Гаврил Нерлов, Лев Прокопьев грант ыланнар, база тэринэн таһаарыылаахтык үлэлии-хамсыы сылдьаллар.
Александр Карманов салайааччылаах “Кэскил” ХЭУо кыралыын-улаханныын 650 сүөһүлээх. Ааспыт сыл түмүгүнэн, 230 ынахтан 478 туонна үүтү туттаран, былаанын толорбута. Быйыл 240 ынахтан 500 туоннаны ыан туттарар соруктаах. Хаһаайыстыба ыанньык ынахтарын Улахан Алааска туттубут саҥа сайылыгын уота-күөһэ оҥоһуллуннаҕына көһөрөр былааннаах, оттон 200-тэн тахса ньирэйин, субан сүөһүтүн Чупчаахха таһаарыахтаах. Ынаҕын ахсаанын элбэтэр, боруодатын тупсарар сыалтан, Смоленскайтан сүүс симменталь тиҥэһэни аҕалан, Аммаҕа “Давидофф” ХЭТ хотонугар харантыыҥҥа туруорда. Былырыын үлэҕэ киллэрбит 120 ынахха анаммыт саҥа комплексын иккис уочаратын быйыл сайын туттуохтаах.
ОДьКХ бочуоттаах үлэһитэ, өрөспүүбүлүкэ тыатын хаһаайыстыбатын туйгуна Юрий Прокопьев бааһынай хаһаайыстыбатын тэринэн үлэлээбитэ уонча сыл буолла. Билигин 70-ча сүөһүлээх. Былырыын 37 туонна үүтү ыан туттарбыта. «Нэһилиэк бастыҥ бааһынайа» номинация хаһаайына, эдэр сааһыттан тыа хаһаайыстыбатыттан илиитин араарбатах чөмпүйүөн-тырахтарыыс Давид Алексеев бааһынай хаһаайыстыба тэринэн үлэлээбитэ үһүс сыла буолла. Былырыын 16 ынаҕыттан 21 туонна үүтү ыан былаанын толорбут.
— Бэйэм уонча эрэ гектар сирдээх буоламмын, дьонтон ходуһа түүлэһэн оттоон итиэннэ эбии Покровкаттан 50 рулон оту атыылаһан кыстаатым. Бааһынай хаһаайыстыбалаахтарга, бастатан туран, ходуһа сирин боппуруоһа быһаарылла илигэ, иккиһинэн уонунан сылларга биир үүт харчыта үрдээбэккэ турара, үсүһүнэн, отук-уматык сыаната сыл аайы ыарыы турара үлэни-хамнаһы тэрийиигэ улаханнык охсоллор. Сүөһү төбөтүгэр көмө харчы биэрэллэрин кэтэспиппит эмиэ ыраатта. Ол да буоллар кыах баарынан үлэлиибит, – диир Давид Алексеев.
Ити курдук Чакыр үлэһит дьоно күннэтэ көрсүллэр ыарахаттартан чаҕыйбакка, үүтү уонна эти дэлэтиигэ үтүө суобастаахтык үлэлииллэр. Сүөһүлэрин хара сиргэ этэҥҥэ үктэннэрэн, бөдөҥ хаһаайыстыбалар сайылыкка тахсарга бэлэмнэнэллэр.
Алтаана Артемьева, Амма, «Саха сирэ» хаһыат. edersaas.ru. Эдик Попов уонна Иннокений Тарасов хаартыскаҕа түһэриилэрэ.