Чурапчы улууһун Чакырыгар үөрүүлээх уонна улахан суолталаах тэрээһин буолла — нэһилиэк күөх төлөҥҥө холбонно. Бу күнү чакырдар өр даҕаны күүппүүттэрэ диэн Чурапчы улууһун дьаһалтатын пресс-сулууспата иһитиннэрэр.
«Чурапчы улууһун күөх төлөҥҥө холбооһун бырайыага 2016 сылтан саҕаламмыта. Нэһилиэк оччотооҕу баһылыга, дьокутаат Татьяна Васильевна Адамова үлэни саҕалаабыта уонна номнуо 2017 сыллаахха бөһүөлэк иһинээҕи турбалар, наадалаах матырыйааллар кэлбиттэрэ. Төһө даҕаны мэһэйдэр баар буолбуттарын иһин, Ил Дархаммыт Айсен Николаев, бырабыыталыстыба, бырамыысыланнас уонна тыа хаһаайыстыбатын министиэристибэлэрин, улуус, нэһилиэк өйөөннөр, бырайыак силигин ситтэ. Чакыр олохтоохторо илэ харахтарынан өрөспүүбүлүкэ салалтата ыытар социальнай бэлиитикэтин үлэтин көрдүлэр», — диэн Андрей Ноговицын тыл эттэ уонна махтанна.
Күөх төлөнү уматыыга улуус баһылыга Андрей Ноговицын, нэһилиэк баһылыга Константин Лебедев, «Эльпромгазстрой» тэрилтэ сүрүн инженерэ Федор Арчахов, «Сахатранснефтегаз» бэрэстэбиитэлэ Александр Дьяконов кыттыыны ыллылар. Итиэннэ быһа сибээһинэн СӨ бырамыысыланнаска миниистирэ Максим Терещенко кытынна.
«Күөх төлөн кэлиитэ олохтоохторго өрүү бырааһынньык буолар. Күөх төлөҥҥө холбонон, дьон тыа хаһаайыстыбатынан, дьиэнэн дьарыктанарыгар бириэмэлэнэр. Өрөспүүбүлүкэ салалтатын уонна гааһы кытта үлэлиир тэрилтэлэр көмөлөрүнэн бу бырайыак олоххо киирдэ», — диэн миниистир эҕэрдэ тылыгар эттэ.
Улуус мунньаҕын бэрэссэдээтэлэ Афанасий Захаров күөх төлөҥҥө, түргэн интэриниэккэ холбонууттан, үчүгэй суолланыыттан нэһилиэк олоҕо сэргэхсийиэҕэ, ыччат элбиэҕэ, демография, олох хаачыстыбата тупсуоҕа диэн бэлиэтээтэ. Оттон нэһилиэк баһылыга Константин Лебедев Чакыр төрүттэммитэ 310 сылыгар олохтоохтор баҕа санаалара туолбутун туһунан эттэ.
edersaas.ru