Бүгүн Олохтоох бэйэни салайыныы күнүнэн нэһилиэктэр баһылыктара, дьокутааттар эҕэрдэ бастыҥын туталлар.
Амма улууһун Чакыр нэһилиэгин баһылыга Прокопий Прокопьев иккис болдьоҕун баһылыгынан талыллан үлэлиир.
Сыл аайы олохтоох салайыныы күнүн көрсө баһылык дьокутааттарын кытта олохтоох оскуолаҕа «Муниципальнай сэбиэт күнүн» ыытар эбит.
— Бэҕэһээ үгэс быһыытынан үрдүкү кылаас оҕолорун кытта көрсүбүт. Нэһилиэкпит сайдыытыгар туһуламмыт бырайыактары, бырагыраамалары билиһиннэрдибит. Оҕолор төрөппүттэрэ олох-дьаһах боппуруостарыгар кэпсэтэллэрин истэ сылдьар буолан, кэпсэтиигэ көхтөөхтүк кытыннылар, араас интэриэһиргиир ыйытыыларын биэрдилэр. Ыччаты кытта маннык көрсүһүү икки өттүттэн туһалаах. Кэлин бу оҕолортон нэһилиэкпитин салайар дьон, бэрэстэбиитэллээх уорган дьокутааттара үүнэн тахсыахтара. Оҕолорбутугар «үөрэх дьыла түмүктэниэр диэри биир эмэ бырайыакта толкуйдааҥ, ол ону нэһилиэк бүддьүөтүттэн үбүлүөхпүт» диэн этии киллэрдибит.
Ити курдук, төрөөбүт нэһилиэктэрин сайдыытыгар оскуола ыскаамыйатыттан бэлэмнээх тахсаллара, кэнэҕэс дойдуларын сайыннаралларыгар үгүс толкуйу аҕалыа диэн эрэнэбит, — диэн Прокопий Прокопьев санаатын үллэһиннэ.
Елена ПОТОЦКАЯ, «Саха сирэ» хаһыат.