Ыам ыйын 6 күнүгэр Ил Дархан Айсен Николаев Ленскэй оройуонугар үлэлиир. Кини онно өрөспүүбүлүкэтээҕи суһал ыстаап мунньаҕын ыытта.
“Якутия” авиахампаанньа анал рейстэринэн Чайыҥдаттан баахта үлэһиттэрин дойдуларыгар тиэрдии үлэтэ былааннаахтык ыытыллар. Ол курдук, бүгүҥҥү туругунан, тыһыынчаттан тахса киһини атын эрэгийиэннэргэ тиэртилэр. Бу үлэ салҕанар. Айсен Сергеевич бэлиэтээбитинэн, 10,5 тыһыынча үлэһиттэн 8,5 тыһыынча киһи көтүөхтээх. Хаалбыт дьон производство үлэтин салгыахтаахтар.
Ыалдьыбыт дьон 95 %-гар ыарыы баара букатын биллибэт эбит: сөтөл да, кыраадыс үрдээһинэ да суох. Кинилэр СӨ доруобуйа харыстабылын министиэристибэтин, Ыксаллаах быһыы-майгы министиэристибэтин уонна “СОГАЗ” көмөтүнэн тэриллибит амбулаторияҕа эмтэнэллэр.
“Стройтранснефтегаз” АУо көмөтүнэн, онно миэстэтигэр анаалыстары ылар кыахтаах аныгы лаборатория сарсыҥҥыттан үлэлээн барыаҕа. Ону тэҥэ, хампаанньа эми-тому атыылаһан, Ленскэйгэ тиксэрдэ. Билигин оройуоннааҕы балыыһа мобильнай госпиталыгар 35 киһи эмтэнэр.
“Билиҥҥи туругунан, Чайыҥдаҕа балаһыанньа федеральнай уонна өрөспүүбүлүкэтээҕи суһал ыстааптар хонтуруолларыгар баар. Ыалдьыбатах, доруобай дьон дойдуларыгар тиийэн баран, икки нэдиэлэлээх харантыын эрэсиимин тутуһуохтаахтар. Хаалбыт ыарыһахтар Чайыҥдаҕа амбулаторнай эмтэниини ааһаллар. Орто ыарахан туруктаах буоллахтарына, Ленскэйгэ, эбэтэр Дьокуускайга эмтэниэхтэрэ”, — диэн Айсен Сергеевич эттэ.
Өрөспүүбүлүкэ салалтата үлэһиттэри атын эрэгийиэннэргэ көтүтэр туһунан “Газпром” ПАУо кытта дуогабардаспыта. Доруобай дьон дойдуларыгар тиийбиттэрин, эбийиэктэргэ дезинфекция ыытыллыбытын, ыалдьыбыт дьону эмтээбит кэннэ, Чайыҥдаҕа балаһыанньа көнөн, үлэ салҕанарыгар эрэнэбит.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru