Өрөспүүбүлүкэтээҕи суһал штаб иһитиннэрэринэн, Чайыҥдаттан 200 киһини Башкортостаҥҥа «Якутия» авиахампаанньа икки анал рейсинэн таста. Бу дьон бары баахталара бүтэн Башкортостаҥҥа, дойдуларыгар төттөрү тиийдилэр. Кинилэргэ ОРВИ сибикитэ суох, хат туттарбыт анаалыстара «отрицательнай» диэн коронавирус дьаҥа суоҕун көрдөрбүт.
34 баахтабай бөһүөлэк баар Чайыҥда ньиэптээх, гаастаах сиригэр муус устар 17 күнүгэр харантыын биллэрбиттэрэ.
Бэҕэһээ Роспотребнадзор лабораторията 39 үлэһит коронавирус дьаҥар сутуллубутун быһаарбыта. ОРВИ ыарыы сибикилээх 105 киһини Ямал-Ненец автономнай уокуругун Ноябрьск куоратыгар, 61 киһини Дьокуускай балыыһаларыгар илдьибиттэрэ. Кэлин бу мантан 23 киһиэхэ коронавирус баара биллибитэ. Өссө 16 ыалдьыбыт киһи баахтабай бөһүөлэк изоляторыгар эмтэниини бара сылдьар.
Ыам ыйын 1 күнүгэр Чайыҥдаҕа сууккаҕа 40-тан 60-ҥа тиийэ киһини көрөр 12 куойкалаах мобильнай госпиталь тэриллибитэ. Манна сортировочнай киин уонна реанимационнай салаа баар. РФ ЫБММ сөмөлүөтэ 125 миэстэлээх дьону быстах кэмҥэ олордор уонна мэдиссиинискэй пууннары аҕалбыта. Билигин Чайыҥдаҕа дьонтон хат анаалыс туталлар.
edersaas.ru
Хаартыска — интэриниэттэн.