Чайыҥдаттан дьону дойдуларыгар төттөрү ыытыы тиһиктээхтик салҕанар

Бүгүҥҥү брифиҥҥэ (07.05.2020) Ил Дархан Айсен Николаев Чайыҥда ньиэп-гаас баайдаах сиргэ хонтуруол тутуһулларын бэлиэтээн эттэ.

—-Сөмөлүөт дьону дойдуларыгар таһан тиһиктээхтик көтөр. Ол түмүгэр, 300-тэн тахса киһи дойдутугар төттөрү көттө. Москваҕа ыытыллыбыт анаалыстар түмүктэнэн эрэллэр. Ол туһунан мин бэҕһээ иһитиннэрэн турабын, —  диэтэ.

Чайыҥдаҕа коронавирус дьаҥар хаптарбыт дьон 95%-гар ыарыы сибикитэ улаханнык билиннэрбэтин, онно миэстэтигэр улаханнык ыалдьааччы суоҕун эттэ.  РФ суһал ыстаабын,  дойду Бэрэсидьиэнин Уһук Илиҥҥэ боломуочуйалаах бэрэстэбиитэл Юрий Трутневы кытары ыкса сибээс баарын, онон боппуруостары быһаарыыга көмө оҥоһулла турарын эттэ. Үлэ суһал ыстаап чэрчитинэн барарын, хонтуруол баарын  иһитиннэрдэ.