Чайыҥда үлэһиттэрин бу күннэргэ Саха сириттэн таһаартыахтара
СӨ Ил Дархана Айсен Николаев, Чайыҥдатааҕы ньиэп-гаас хостуур сиргэ баахтанан үлэлиир дьону “Газпром” хампаанньа бу күннэргэ Саха сириттэн таһаартыаҕа диэн иһитиннэрдэ. Манна коронавирус тарҕаныытынан соччото суох эпидемиологическай балаһыанньа үөскээбитэ.
edersaas.ru
Чайыҥдаҕа “Газпром” араас бэдэрээттиир тэрилтэтин 34 баахтанан бөһүөлэгэ баар. Онно 10 тыһыынчаттан тахса киһи олорор. Бүгүҥҥү күҥҥэ 56 киһи Саха сирин балыыһатыгар ыалдьан эмтэнэ сытар. Бу иннинэ өссө 39 үлэһити Ямало-Ненецкэй автономнай уокурук Ноябрьск куоратыгар эмтэтэ ыппыттара.
“Ааспыт нэдиэлэҕэ биһиги көрдөһүүбүтүнэн, Согаз көмөтүнэн онно баар дьонтон барыларыттан анаалыс ылбыттара. Билиҥҥитэ түмүгэ биллэ илик. Ол эрээри, барыллаан чахчыларынан ыалдьыбыт киһи ахсаана элбэх буолар чинчилээх. “Газпром” бу дьону кэлбит эрэгийиэннэригэр илдьэргэ бэлэм. Саха сирин олохтоохторо онно суохтарын кэриэтэ. Доруобай үлэһиттэр тута обсерваторга киириэхтэрэ, ыарыһахтары инфекционнай балыыһаҕа угуохтара. Биһиги бэйэбит өттүбүтүттэн ирэдэнэр көмөнү барытын оҥоробут. Биһиги инфекционнай балыыһаларбытыгар Чайыҥдаттан билигин 56 киһи сытар. Туһааннаах сиргэ “Газпром” исписэлиистэрин кытта биһиги медиктэрбит уонна өрөспүүбүлүкэ Роспотребнадзорун управлениетын исписэлиистэрэ үлэлииллэр”, — диэн Айсен Николаев кэпсээтэ.
Ону тэҥэ, Ил Дархан, РФ бырабыыталыстыбатын бэрэссэдээтэлин социальнай бэлиитикэҕэ боппуруостарыгар солбуйааччы Татьяна Голикова сорудаҕынан, муус устар 30 күнүгэр ЫБММ (Ыксаллаах быһыы-майгы министиэристибэтэ) ньиэп-гаас хостонор сиригэр мобильнай госпиталы тэрийиэҕэ диэн иһитиннэрдэ. Балаһыанньа тыҥааһыннаах, үлэлэрин бүтэрбит биригээдэлэр барар кыахтара суох, ыалдьыбыттары уонна доруобайдары араарыы бүтэ илик. Айсен Николаев этэринэн, бэдэрээтчит тэрилтэлэр салайааччылара миэстэтигэр тиийэн дьон усулуобуйатын уонна кэлбит сирдэригэр илдьии боппуруоһун быһаарыахтара.
Санатан эттэххэ, муус устар 11 күнүгэр Чайыҥдатааҕы ньиэп-гаас хостонор сиригэр үлэһиттэр коронавируһунан ыалдьыбыттара биллибитэ. Бу түгэнинэн Саха сирин Ил Дархана Айсен Николаев РФ бэрэсидьиэнин Уһук Илин уокурукка боломуочуйалаах бэрэстэбиитэлэ Юрий Трутневка, РФ доруобуйа харыстабылын миниистирэ Михаил Мурашкоҕа уонна “Газпром” ПАУо салалтатыгар Алексей Миллерга тахсыбыта. Ил Дархан этиитинэн, сутуллуу тахсыан сөбүн бохсор миэрэлэри ыларга “Газпром добыча Ноябрьск” хампаанньаҕа суһал штаб тэриллибитэ. Муус устар 17 күнүгэр СӨ Ил Дарханын ыйааҕынан Чайыҥдатааҕы ньиэп-гаас хостонор сиригэр харантыын биллэриллибитэ, ыарыы салгыы тарҕамматын туһугар территория иһигэр киирэр-тахсар хааччахтаах.
СӨ Ил Дарханын уонна бырабыыталыстыбатын пресс-сулууспата