Бүгүн, муус устар 17 күнүгэр, Ил Дархан Айсен Николаев брифиҥҥэ Чайыҥда ньиэп-гаас баайдаах сиригэр харантыын биллэриллибитин эттэ. Маннык быһаарыы хас да киһи коронавирус дьаҥыгар хаптаран, баахтабай бөһүөлэккэ эпидемиологическай балаһыанньа уустугурбутунан ылыллыбыта.
—Билиҥҥитэ, «Газпром» структурата үлэһиттэр кыраадыстарын мээрэйдиири итиэннэ дьаҥҥа хаптарбыттары кытары хантаактаахтары чуолкайдыыр үлэни хонтруолга тутар. Онно үлэлиир дьоҥҥо бука барыларыгар, «Газпром» көмөтүнэн коронавирус дьаҥын бэрэбиэркэлиир тестирование ыытыллыаҕа. Санатан эттэххэ, «Газпром добыча Ноябрьск» кэлин эбии үс киһи балыыһаҕа анаалыс туттарбыта үчүгэй буолла.
Ленскэйгэ хонтуруол баар. Оройуон дьаһалтата, «Газпром», өрөспүүбүлүкэ суһал ыстааптарынан ыарыыны бохсор үлэлэр күүһүрэллэр. Бука бары көмөлөөн дьаҥ тарҕанарын тохтотуохпут, кыайыахпыт диэн эрэнэбин, — диэтэ Ил Дархан. Дьиэҕэ хааччахтанан олорор эрэсиими, ирдэбиллэри тутуһарга ыҥырда.