«Газартстрой» ХЭУо салалтата СӨ Бырабыыталыстыбатын, Роспотребнадзору уонна бары эппиэттээх сулууспалары кытта төгүрүк суукканы быһа Чайыҥдаҕа эпидемиологическай балаһыанньаны чөлүгэр түһэрэр үлэни ыыталларын бэлиэтээтэ.
edersaas.ru
Хампаанньа үлэни суһаллык уонна толору кээмэйдээхтик толорор. Ол курдук, үлэһиттэр тустаах медицинскэй көмөнөн туһаналларын, дьиэлэригэр барыыларын уонна бэйэлэрин дойдуларыгар тиийэн, сөптөөх усулуобуйалаах обсерваторга киирэллэрин хааччыйар.
Ыам ыйын 3-6 күннэригэр Чайыҥдаттан уон биир сөмөлүөтүнэн 1100 киһи дойдутугар төнүннэ. Ол курдук, 800 киһи Башкирияҕа, 100-түү киһи Волгоград, Оренбург уонна Томскай уобаластарга тиийдилэр. Ону тэҥэ, бу күннэргэ Иркутскай, Омскай, Челябинскай уонна Новосибирскай уобаластар, Алтай уонна Пермь кыраайдара, Бурятия, Татарстан уонна Удмуртия өрөспүүблүкэлэрэ бэйэлэрин дьоннорун көрсүөхтэрэ. РФ атын да эригиэйэннэрин кытта дьону тиэрдиигэ кэпсэтии ыытыллар. Кэпсэтии быһыытынан, Чайыҥдаттан тиийбит дьон санаторийдарга, гостиницаларга, пансионаттарга киирэллэр уонна эмчиттэр кэтээн көрүүлэригэр сылдьаллар.
Чайыҥдаҕа бэйэтигэр мэдиссиинэ 39 үлэһитэ үлэлиир. Хампаанньа 120 миэстэлээх 4 терапия балааталаах, 5 ИВЛ аппарааттаах, лабораторнай комплекстаах, анал мэдиссиинискэй аппаратуралаах госпиталы үлэлэтэр. Компьютернай томографияны оҥорор тэрил уонна автоматическай ПЦР-лаборатория бу күннэргэ тиэрдиллиэхтэрэ. Маны тэҥэ, ЫБММ 125 миэстэлээх полевой госпиталы олохтоото.
Коронавирус сыстыганнаах дьаҥынан сибээстээн, тутуу үлэтэ тохтотулунна. Эбийиэктэргэ барытыгар дезинфекция ыытыллар.
Елена ПОТОЦКАЯ, «Саха сирэ» хаһыат, edersaas.ru
Хаартыска: СИА