Бүгүҥҥү күҥҥэ Чайыҥда үлэһиттэрин үксэ — баахтаҕа үлэлии кэлбит атын эригийиэннэр олохтоохторо.
edersaas.ru
Өрөспүүбүлүкэ салалтата Чайыҥдатааҕы ньиэби-гааһы хостуур тэрилтэҕэ Саха сирин олохтоохторун үлэлэтэр соруктаах. Бу боппуруоска Ил Дархан Айсен Николаев сорудаҕынан вице-премьер Алексей Колодезников эригийиэннээҕи миниистэрдэри уонна промышленнай хампаанньалар салайааччыларын кытта видео-сибээһинэн мунньахтаата.
Мунньахха бэлиэтэммитинэн, Чайыҥдаҕа үлэлии сылдьар 10600 киһиттэн өрөспүүбүлүкэ олохтооҕо — 240 эрэ киһи. Уоннааҕылар – Арассыыйа 78 эригийиэнин олохтоохторо. Сыстыганнаах дьаҥ өрө турбутугар 6 тыһ. киһи дойдутугар барбыта. Бүгүҥҥү күҥҥэ баахтанан үлэлиир 4,5 тыһ. киһи баар. Мантан өссө 1 тыһ. киһи дойдутугар барыахтаах.
Алексей Колодезников бэлиэтээбитинэн, өрөспүүбүлүкэ салалтата үөскээбит балаһыанньанан туһанан, Чайыҥдаҕа олохтоох дьону үлэлэтэр соруктаах. Бу туһунан сүрүн бэдэрээччиттэри — «Газпрому» уонна «Стройтранснефтегаһы» кытта кэпсэтии барбыт.
Бастакы вице-премьер дьону үлэлэтии бэс ыйыгар саҕаланыаҕын, онуоха диэри сөптөөх быһаарыы ылыллыан наадатын ыйда.
Нэһилиэнньэ үлэлээх буолуутун кэмитиэтин салайааччыта Степан Москвитин сыл саҥатыттан 22322 киһи үлэ көрдөөн бэлиэтэммитин холобурдаата. Былырыыҥҥы сылы кытта тэҥнээтэххэ, бу 62,4% үрдүк көрдөрүү. Бу дьонтон кулун тутар 1 күнүнээҕи чахчынан 12747 киһи учуокка турбут. Мантан инньэ үлэтэ суох киһи ахсаана элбиир чинчилээх.
Дьону үлэлээх оҥорууга «Олохтоох каадыры — бырамыысыланнаска» бырайыак эрэли үөскэтэр. Былырыын бу бырайыак сүнньүнэн 8 тыһ. өрөспүүбүлүкэ олохтооҕо үлэ булуммут. «Анаабыр алмаастара» тэрилтэ дьону үлэнэн хааччыйыыга өйөбүл буолуоҕа. Манна үлэһиттэрэ 100% – олохтоох каадырдар.
Мунньахха кыттыыны ылбыт «Стройтранснефтегаз» тэрилтэ генеральнай дириэктэрин солбуйааччы Константин Нуриев хампаанньа олохтоох каадырдары үлэлэтэргэ интэриэстээҕин бэлиэтээтэ. Тэрилтэ оробуочайдарга, ИТР-үлэһиттэргэ, машинистарга наадыйар эбит. Сүрүн үлэ сайын ыытылларынан сибээстээн, үлэһит илии ордук бу кэмҥэ наадатын ыйда.
Мунньах кыттыылаахтара кылгас кэм иһигэр олохтоох каадырдары үлэнэн хааччыйыыга тустаах үлэни ыытарга быһаарыы ылыннылар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Маия Васильева түһэриитэ.