Чайыҥдатааҕы ньиэп-гаас хостуур сиргэ хас даҕаны киһи коронавируһунан ыалдьыбыта биллэн, муус устар 17 күнүттэн харантыын эрэсиимэ биллэриллибитэ.
Өрөспүүбүлүкэ бырабыыталыстыбатын туруорсуутунан миэстэтигэр суһал штаб тэриллэн, Дьокуускайтан Роспотребнадзор уонна мэдиссиинэ үлэһиттэрэ тиийбиттэрэ. Бастакы ыалдьыбыт уонна ыалдьыбыта сабаҕаланар дьону «Газпром» анал рейсинэн Ноябрьскайга илдьибитэ. Ыарахан туруктаах 56 ыарыһах Ленскэй уонна Дьокуускай инфекционнай балыыһаларыгар эмтэнэллэр.
Чайыҥдаҕа барыта 10 тыһыынчаттан тахса киһи үлэлиир. Манна “Газпрому”таһынан бэдэрээтинэн үлэлиир тэрилтэлэр бааллар. Муус устар 20 күнүгэр бары үлэһиттэр туттарбыт анаалыстарын түмүгүнэн тыһыынчаттан тахса киһи коронавируһунан ыалдьыбыта сабаҕаланар диэн Айсен Николаев этэн турар.
СӨ доруобуйа харыстабылын систиэмэтэ олус элбэх ыарыһаҕы тэҥинэн эмтиир кыаҕа суох буолан, коронавируска саарбаҕланар үлэһиттэр бэйэлэрин эрэгийиэннэригэр баран эмтэнэллэрин тэрийии үлэтэ ыытылла турар. Ол курдук, Ямалга 39 киһи, Омскайга 50-ча киһини тириэрдилиннэ. Бу нэдиэлэ өрөбүллэригэр үлэһиттэри таһаарыы салҕаныаҕа.
РФ бырабыыталыстыбатын бэрэссэдээтэлин солбуйааччы Татьяна Голикова ыйааҕынан бүгүн, муус устар 30 күнүгэр Чайыҥдаҕа эбии көһө сылдьар госпиталь тэриллиэҕэ.
Билигин Чайыҥдаҕа «СОГАЗ Профмедицина» 8 бырааһа, 3 мэдиссиинэ сиэстэрэтэ, «Газпром добыча Ноябрьск» тэрилтэ 3 биэлсэрэ, бэдэрээтинэн үлэлиир тэрилтэ 7 биэлсэрэ уонна СӨ Доруобуйа харыстабылын министиэристибэтин лиинийэтинэн 5 быраас, 5 биэлсэр үлэлиир. «Газпром добыча Ноябрьск» уопсай дьиэтигэр обсерватор, 4 миэстэлээх интенсивнай терапия анал балаатата тэрилиннэ.
Ньургуйаана Иванова, “Саха сирэ” хаһыат, edersaas.ru
Хаартыска— интэриниэттэн.