Олунньу 19 күнүгэр Ил Дархан Айсен Николаев «Газпром добыча Ноябрьск» хампаанньа үлэтин 2018 сыллааҕы түмүктэрин уонна 2019 сылга былааннарын көрөр мунньаҕы ыытта.
edersaas.ru
«Газпром добыча Ноябрьск» ХЭТ «Газпром» хампаанньа салаата Ямалга, Камчаткаҕа уонна Саха сиригэр ньиэби, гааһы хостооһунунан дьарыктанар. Өрөспүүбүлүкэҕэ Чайаҥдатааҕы ньиэп, гаас конденсаатын туһаҕа таһаарар.
Тэрилтэ генеральнай дириэктэрэ Игорь Крутиков иһитиннэрэринэн, 2019 сылга «Сибиир күүһэ» магистральнай гаас турбата үлэтин саҕалыахтаах, итиэннэ Чайаҥдаҕа ньиэби, гааһы хостуохтара.
Хампаанньа «Олохтоох дьону — бырамыысыланнаска» бырайыакка кыттан, Чайаҥдаҕа күн бүгүн 250 киһи үлэлиириттэн – 63 төрүт олохтоох дьон.
Мунньах түмүгэр Ил Дархан Айсен Николаев: «Бу сыл бүтэһигэр «Сибиир күүһэ» магистральнай гаас турбата холбонон, дойду, өрөспүүбүлүкэ экэниэмикэтин сайыннарар стратегическай суолталаах мэҥэ бырайыак кыаҕын ылын, туһаҕа тахсыа», — диэн эрэлин биллэрдэ.
«Сибиир күүһэ» — 3000 килэмиэтир уһуннаах гаас магистральнай ситимэ Сахабыт сирин Ленскэй оройуонугар баар Чайаҥдатааҕы сир баайдаах учаастактан силистэнэн-мутуктанан тахсан, Уһук Илин куораттарын уонна дуогабар быһыытынан Кытайы 30 сыл тухары гааһынан хааччыйыахтаах. Сылга 38 млрд куб гаас Кытайга тахсан, улахан үп-харчы итиннэ эргийиэхтээх.
Марианна Тыртыкова, «Саха сирэ», edersaas.ru