Дьокуускайга “Доверие” диэн ааттаах, кырдьаҕастар уонна инбэлииттэр олорор чааһынай пансионаттарыгар 9 киһи коронавируһунан ыалдьыбыта билиннэ. Өрөспүүбүлүкэтээҕи суһал ыстаап бэрэссэдээтэлэ Ольга Балабкина иһитиннэрбитинэн, онно бэрэбиэркэ ыытыллар.
edersaas.ru
— Муус устар 1 күнүттэн судаарыстыбаннай да, чааһынай да пансионаттар сабыылаах эрэсиимҥэ, кытаанах харантыыҥҥа көспүттэрэ. Муус устар 28 күнүгэр онно үлэһиттэр солбуйсуулара буолбут. Бэрэбиэркэ бара турар, эрэсиим ирдэбиллэрин кэһии баара дуу, суоҕа дуу сотору кэминэн биллиэҕэ. Билигин ыалдьыбыт дьон инфекционнай балыыһаҕа киирдилэр, пансионат олохтоохторуттан анаалыс ылылынна, кинилэр миэстэлэригэр «изоляцияҕа олороллор, — диэн Ольга Балабкина брифинг кэмигэр иһитиннэрдэ.
Бастакы ыарыһах биллээтин кытта, «Роспотребнадзор» Саха сиринээҕи управлениета борокуратуураттан көҥүллэтэн, ыам ыйын 2 күнүгэр пансионакка тиийэн, былааннамматах бэрэбиэркэ оҥорбут.
Ол түмүгүнэн, пансионаты аһан үлэлэтэр урбаанньыт санитарнай ирдэбиллэри тутуспатаҕа биллибит. Ол курдук: профилактика үлэтэ үчүгэйдик ыытыллыбатах, харантыын кытаанах ирдэбиллэрин тутуспатахтар. Ону тэҥэ, пансионат олохтоохторо уонна үлэһиттэрэ куоракка тахсан көҥүл айанныыллар уонна сабыылаах тэрилтэҕэ атын дьон киирэ сылдьаллар эбит.
Пансионат салайааччытыгар икки административнай дьыаланы тэрийдилэр. Биир административнай дьыала (РФ КоАП 6.3 ыст., 2 чааһа) Дьокуускай куораттааҕы суукка бэрилиннэ. Пансионакка “Гигиена уонна эпидемиология киинэ” кэлэн дезинфекциялаата. Хантаактаспыт дьон “изоляцияҕа” бардылар, кинилэри быраастар кэтээн көрөллөр.
Ангелина Васильева, “Саха сирэ” хаһыат, edersaas.ru
Хаартыска: news.ru