Саха сиригэр чааһынай дьиэни туттууга чэпчэтиилээх ипотеканы ылыы саҕаланна. Федеральнай бырагырааманан, РФ бырабыыталыстыбатын быһаарыытынан, сэттэ бырыһыаннаах чэпчэтиилээх ипотеканан туһанан аны чааһынай дьиэни киһи бэйэтэ туттуон сөп буолла.
Өскөтүн урут бу чэпчэтиилээх кирэдьиити туһанан чааһынай дьиэни тутааччы хампаанньаттан ылар эбэтэр бэдэрээттэһэн тутар биригээдэлэри кытары дуогабардаһан туттарар буоллахха, билигин хайа баҕарар бэйэ күүһүнэн туттуохха сөп буолла. Кирэдьиити ылыы биир сүрүн усулуобуйатынан дьиэни биир сыл иһигэр тутан бүтэрэн докумуоннатыллыахтаах.
Ил Дархан Айсен Николаев бэлиэтииринэн, Саха сиригэр үгүс киһи чааһынай дьиэ туттарынан бырабыыталыстыба манна көмө-тирэх буолуохтаах. Бу федеральнай бырагырааманан муҥутаан 6 мөлүйүөн солкуобайы кирэдьиит ылыахха сөп. Билигин бу бырагырааманан өрөспүүбүлэтээҕи ипотечнай агентство үлэлээн эрэр.
Аграфена КУЗЬМИНА