Чаҕылхай Сунтаар сулуһа — Лена Спиридонова туһунан кинигэ сүрэхтэннэ
Лена Спиридонованы биһиги, сунтаардар, кини сүгүрүйээччилэрэ бастыҥ ырыаһыт, чаҕылхай сулус, үтүө киһи диэн ахтабыт-саныыбыт. Кини ырыалара хас биирдии истибит киһи сүрэҕэр дириҥник иҥэн, кэрэни кэрэһилиир!
Кини Дьылҕа ыарахан ыйааҕынан эрдэ биһиги кэккэбититтэн туораабыта. Бэйэтин кэнниттэн элбэх ырыаны бэлэх быһыытынан хаалларбыта улахан дьол.
«Ырыа кэрэ эйгэтигэр» диэн Лена Спиридонова аатын үйэтитэр, олоҕун сырдатар-кэпсиир сыаллаах кинигэни биллиилээх суруналыыс Зинаида ИГНАТЬЕВА таһааран, Ленаны сурукка тиһэн аатын тилиннэрдэ!
Үйэтитэр сыаллаах тэрээһин Лена саамай биллэр «Баҕарабын дьол аргыстаһыан» диэн ырыатынан арыллан барыбытын уйадытта. Салгыы оҕо сааһын доҕотторо, бииргэ үөрэммит оҕолоро истиҥ ахтыы оҥордулар. Алексей Свидерскэй киниэхэ анаабыт ырыатын иһитиннэрэн, ол кэрэ кэми санатта. Бу күн ырыаһыт биһиктээбит, ыра оҥостубут ырыалара иһилиннилэр, үҥкүүнэн толоруллан суолтатын үрдэтэн биэрдилэр. Кырдьыга да кини толорор ырыаларынан элбэх да үҥкүү күн сирин көрбүт эбит.
Иккис түһүмэххэ Сунтаардааҕы кииннэммит библиотека үлэһитэ Камила Афанасьева ырытыы оҥордо.
Лена ырыалара үксүлэрэ Саргылана Спиридонова -Кэрэмэс кийиитэ, Ангелина Шадринова — Суоһааны, Александра Григорьева — Сандаарыйа, Илья Зверев хоһооннорун, убайа Сиэн Тиитэп матыып айан толорон биэрбитин истиҥ ырыа гынан сүгүрүйээччилэригэр сүрэхтээбитэ.
Күн сирин көрдөрбүт дьоно — төрөппүттэрэ Николай Николаевич уонна Екатерина Агафодоновна тэрийээччилэргэ, күүс-көмө буолбут дьоҥҥо, ахтыы оҥорбуттарга барҕа махталларын биллэрдилэр.
Үһүс түһүмэххэ Лена айар аартыгын арыйан ахтыы буолла, аан дойдуга аатырбыт «АЙТАЛ» бөлөх саҕалааһына кини үтүөлээх өҥөтө, күүстээх куолаһын кэрэһитэ! Бу түһүмэххэ куйаар ситимин нөҥүө ыытыллыбыт улахан дьон илдьиттэрин иһиттибит-көрдүбүт.
Виталий Власов кинини Айыы Умсуур Удаҕаҥҥа тэҥнээтэ, итэҕэл ырыаһыта, сахалыы куттаах сэдэх ырыаһыт диэн санаатын үллэһиннэ.
Оттон Алексей Егоров кинигэ тахсыбытыгар үөрбүтүн, Ленкабытын олус истиҥник саныырын, сүрэхпитигэр куруутун баар диэн, Спиридоновтары чулуу мусукааннар быһыытынан сыаналыырын, Лена туспа, ураты көрүүлээх ырыаһытын, «Айтал» бөлөҕү саха дьоно бары күүтэллэрин, сахалыы рогу бастаан кинилэр киллэрбиттэрэ махталлаах дьыала диэн эппитин иһитиннэрдилэр.
Александр Бурнашев, эдьиийим курдук саныыбын, кини биһиэхэ куруутун күүтүүлээх ыалдьыт буолара, ырыабын Сахаайа толороро буоллар диэн мэктиэ тыллаах буолара, ол эрдэ барарын билэ сылдьар курдук этинэрэ дьикти этэ, диэтэ. Оттон Сахаайа, кинини күүстээх энергетикалаах ырыаһыт, улахан пародист быһыытынан билэбин, умнубаппын, миэхэ холобур буолар киһи, тиһэх күнүн чугаһыгар миэхэ ыалдьыттаан, ырыаларын бэлэх оҥорон толороор диэбитэ, диэн санаатын үллэстибитэ истиэххэ олус уйадытыылаах этэ.
Тамара Попова, Леналыын ырыаһыт буолан баран билсибитин, кини сүбэтинэн кынаттаммытын, ырыаларын сэргээн ырыаһыт буоларыгар көмөлөспүтүн ахтар.
Ырыаһыт Чыскыырай: » Лена ыллаатаҕына саха ырыата, тэтимэ барыта көстөр, саха дьахталларыттан маҥнайгы этно-рок сулуһа буолар».
Бу иһирэх тыллар Ленабыт улахан ааттаах ырыаһыт эрэ буолбакка, киһи киһитэ буоларын кэрэһилииллэр. Салгыы Ленабыт араас ырыалара эдэр мусукааннар толорууларыгар иһиллэн, иккистээн тыыннаннылар!
Төрдүс түһүмэххэ, Татьяна Заровняева, улуу бөлөх тыынар салгына, этэр тыла этэ диэн урукку кэми эргитэн кинини санатта. Сахалыы тэтим кэрэһиттэрэ кини уонна «Айтал» этэ! Кинилэр САХА буоларбытын элбэх киһиэхэ биллэрбиттэрэ, саха кутун уһугуннарбыттара, диэн эттэ.
Бэһис түһүмэххэ убайдара, аймахтара кини баар кэмин санаан, сүгүрүйээччилэргэ элбэх саҥаны арыйдылар, Сиэн Тиитэп, ырыаһыт дьоло уонна соро диэн аһаҕас кэпсэтиини таһаарда, кырдьык да дэтэр курдук, ырыа сиэртибэтэ эмиэ буолуохха сөп. Лена Спиридонова аатыгар ыытыллыбыт ырыа күрэҕэр кылаан ырыаһыт буолбут Стас Тараяров икки ырыаны бэлэх уунан, саха ырыатын маанытын иһитиннэрдэ. Тэрээһини уоскулаҥ, киһини ылыннарар тыллаах-өстөөх кийииттэрэ Надежда Спиридонова ыытан, иһирэх уонна истиҥ буолла. Тэрийээччилэргэ, чуолаан, оҕо искусствотын оскуолатыгар, Олоҥхо дьиэтигэр уонна улуустааҕы кииннэммит библиотекаҕа махтал. Бу күн элбэх киһи ыллаата да, ытаата да… бу сулус аттыбытыгар баарыттан!
СУЛУСТАР УМНУЛЛУБАТТАР, БИҺИГИ ЛЕНАБЫТ ААТА ҮЙЭТИТИЛЛЭН, ЫРЫАТА КЭНЧЭЭРИ ЫЧЧАККА САХА ТЫЫНЫН КУРУУТУН БИЭРЭ, ИҤЭРЭ ТУРУОҔА! МАХТАЛ ЭЙИЭХЭ, УЛАХАН ЫРЫАҺЫККА!
Мария КОБЕЛЬЯНОВА — ТУСКУЛААНА, Сунтаар, edersaas.ru сайтка анаан.