Чаҕылхай спортсмен, биллиилээх бөҕөс Захар Чукров орто дойдуттан барда

Саха сирин суон сураҕырдыбыт, аар-саарга аатырдыбыт чаҕылхай тустуук, биллиилээх бөҕөс, спорт маастара Захар Николаевич Чукров орто дойдуттан барда.   

Саха АССР чөмпүйэнээттэрин 1972,1977,1978 сс. кыайыылааҕа. Саха АССР XXV, XXVI, XXVII, XXVIII уонна XXX чөмпүйэнээттэригэр чаҕылхай кыайыылары ылан дойдулаахтарын улаханнык үөрдүбүтэ. 1979 с. “Манчаары оонньууларыгар хапсаҕайга күрэстэһэн муҥутуур кыайыылаах буолбута. 1981 сыллаахха Усть-Каменогорскайга «Урожай» ДСО Киин Сэбиэтин боруонса, ССРС тыа сирин спортсменнарын үрүҥ көмүс призердара.  1983 с.Орджоникидзе уонна Кисловодск куораттарга ыытыллыбыт “Трудовые резервы” ДСО Арассыыйатааҕы уонна Киин Сэбиэтин чөмпүйүөннэрэ. Манчаары оонньууларын IX спартакиадатын хапсаҕайга муҥутуур кыайыылааҕа. Саха АССР аҕыс төгүллээх чөмпүйүөнэ, XX үйэ «Сахаада-спорт» ассоциациятын лауреата. 1995 сыллаахха Болгарияҕа ветераннарга ыытыллыбыт аан дойдутааҕы үрдүк таһымнаах күрэхтэһии чөмпүйүөнэ. Чулуу спортсмен, биллиилээх бөҕөс күрэхтэспит ыйааһына 82-90 киилэ.

Чаҕылхай кыайыыларынан бар дьону сөхтөрбүт улахан спортсмен, чулуу бөҕөс Захар  Николаевич Чукров киэҥ Арассыыйаҕа, Саха сирэ далааһыннаах күрэстэригэр инники күөҥҥэ сылдьарын, мөккүөрэ суох ыраас кыайыытынан сөхтөрөрүн доҕотторо, билэр дьоно ахталлар-саныыллар.

Хаартыска: gallery.ykt.ru  ылылынна