Бэҕэһээ Таатта улууһугар, Чөркөөххө, спорт былаһааккатын аһыллыытын үөрүүлээх түгэнэ буолла. Быйыл “Үөрэх” национальнай бырайыак «Хас биирдии оҕо ситиһиитэ» хос бырайыагын иитинэн, спорт былаһааккатын бүрүөһүнүн ыларга Чөркөөх орто оскуолатыгар үбүлээһин көрүллүбүтэ.
edersaas.ru
Былаһаакка СӨ Үөрэҕин уонна наукатын министиэристибэтин иһинэн үлэлиир “Оҕо уонна ыччат этин-сиинин уонна успуорка сайдыытын киинин” дириэктэрэ Афанасий Имматулович Андреев, СѲ норуот дьокутаата Михаил Дмитрьевич Гуляев көмөлөрүнэн, тус кыттыыларынан ситэн-хотон, оҥоһуллан олоххо киирдэ.
Үөрүүлээх тэрээһин кыһыл лиэнтэтин Октябрьскай нэһилиэк баһылыгын солбуйааччы Александра Васильевна Вырдылина, физкультура учуутала, волейбол тренерэ Владимир Николаевич Сивцев, физкультура учуутала, «Чыпчаал» фитнес-аэробика кулуубун салайааччыта Анна Алексеевна Никитина, 10-с кылаас бастыҥ үөрэнээччитэ, спортсмен Слава Лебедев быстылар.
Оскуолабыт киэн туттар бастыҥ спортсменнара, кыһыл көмүс мэтээллэрин түөстэригэр кэтэн парааттаан киирдилэр. Оҕолор үөрүүлэрин көрөн киһи астынар, дуоһуйар. Бу кэрэ-бэлиэ түгэнинэн Александра Васильевна Вырдылина, Таатта улууһун үөрэҕириитин салалтатыттан Мария Андреевна Оконешникова, П.А. Ойуунускай аатынан Чөркөөх орто оскуолатын дириэктэрин үөрэх чааһыгар солбуйааччы Мария Дмитриевна Оконешникова, Н.Н Тулааһынап аатынан норуот айымньытын дьиэтин салайааччыта Афанасий Иванович Собакин, «Чыпчаал» фитнес-аэробика кулуубун лидерэ Айыына Тимофеева эҕэрдэлээтилэр.
Спорт киһи олоҕор улахан суолталаах. Билиҥҥи олохпут ирдэбилэ — чөл олоҕу тутуһуу, спордунан дьарыктаныы, эти-хааны чэбдигирдэн доруобуйаны тупсарыы. Үөрэнээччилэрбит спорду өрө тутан, сөбүлээбит көрүҥнэринэн ситиһиилээхтик, дьаныардаахтык дьарыктанан, араас күрэхтэһиилэргэ кыайан-хотон, төрөөбүт дойдуларын, улуустарын, үөрэммит оскуолаларын ааттатыахтара диэн эрэнэбит.
Биһиги нэһилиэкпит спортка сыһыаннаах историятын сэгэтэн көрдөххө, Чөркөөх, төрөөбүт түөлбэлэрин аатын араас таһымнаах күрэхтэһиилэргэ аатырдыбыт-ааттаппыт спортсменнарбыт аҕыйаҕа суохтар. Сахалар киэн туттар көрүҥмүтүгэр — тустууга спорт маастардара Калистрат Владимиров, Григорий Массаев, Василий Алексеев, Егор Огоюкин, Гаврил Варламов, Терентий Халгаев, Иван Собакин, о.д.а. буолаллар.
Нэһилиэк киэн туттуутунан саахыматчыт дьиэ-кэргэттэр Тихон, Мэндэ, Амур, Дмитрий Таппыровтар, Николай, Дмитрий, Мария, Марфа Мосориннар, Анатолий Евгений, Константин Охотиннар буолаллар. Кинилэр уһуйбут иитээччилэринэн Дмитрий, Людмила, Надежда Максимовтар, Юрий Мэндеич Таппыров дьиэ кэргэттэрэ, дуобат оонньуутугар маастарга кандидат, педагогическай үлэ бэтэрээнэ Константин Константинович Матаннанов, остуол оонньууларыгар, теннискэ нэһилиэкпит, улууспут, өрөспүүбүлүкэбит чиэһин үрдүк таһымнаахтык ааттатар педагогическай үлэ бэтэрээнэ, СӨ спордун туйгуна Светлана Романовна Слепцова буолаллар. Светлана Романовна үөрэнээччилэрэ Айсен Жерготов, Гаврил Власов, Анжела Жерготова, Дуня Слепцова өрөспүүбүлүкэ, улуус хамаандаларыгар ситиһиилээхтик күрэхтэһэллэр.
Спорт биир көрүҥэр, чэпчэки атлетикаҕа, марафоҥҥа нэһилиэкпит, улууспут, өрөспүүбүлүкэбит чиэһин көмүскүүр спортсменнарбыт: Филипп Спиридонович Гуляев, Никандр Гаврильевич Слепцов, Владимир Владимирович Находкин, Егор Егорович Жерготов, Василий Егорович Слепцов, Маргарита Прокопьевна Собакина, о.д.а.
Ѳбүгэлэрбит оонньуулара — мас тардыһыыта, бүтүн аан дойду сэҥээриитин ылла. Биһиги нэһилиэкпит мадьыныларынан Гаврил Гаврильевич Жегусов, Алексей Алексеевич Ущницкай, Вячеслав Иванович Аввакумов, Валентина Ивановна Кулаковская, Афанасий Афанасьевич Собакин, Надежда Михайловна Гоголева, Сайыына Филатова, о.д.а. биллэллэр.
Кэнники сылларга Анна Алексеевна Никитина салайааччылаах «Чыпчаал» фитнес-аэробика кулууба, Саха сирин оонньууларын, өрөспүүбүлүкэтээҕи, улуустааҕы көрүүлэр лауреаттара, призердара буолаллар.
Вячеслав Иванович Аввакумов салайааччылаах Г.Г.Власов аатынан нэһилиэкпит культурнай-спортивнай киинэ спорду сэҥээрээччилэри, спордунан дьарыктанааччылары түмэ тардар. Сыл аайы тиһигин быспакка волейболга, мас тардыһыытыгар өрөспүүбүлүкэтээҕи күрэхтэһиилэр үрдүк таһымнаахтык ыытыллаллар. Волейболга Владимир Николаевич Сивцев нэһилиэк олохтоохторун, эдэр ыччаты, оскуола оҕолорун дьарыктыыр. Үөрэнээччилэри тустууга Олег Викторович Попов ситиһиилээхтик дьарыктыыр.
Чөл олоҕу, спорду, чэбдигирдиини өрө тутар киһи олоххо ситиһиилээх буолар. Саҥа аһыллыбыт спорт былаһаакката дьарыктанарга күүс-көмө буоллун, үрдүк ситиһиилэргэ, киэҥ аартыктарга ыҥыра турдун!
П.А. Ойуунускай аатынан Чөркөөх орто оскуолатын аатыттан бары көмөлөспүт, күүс-көмө буолбут дьоммутугар улахан махталбытын тиэрдэбит.
Чөркөөх орто оскуолатын дьаһалтата.