Ааспыт өрөбүл күннэргэ өрөспүүбүлүкэ үрдүнэн элбэх улахан таһымнаах күрэхтэһиилэр ыытылыннылар. Ол курдук, Петр Алексеев кэриэһигэр хапсаҕайга, Арсен Петров кэриэһигэр боксаҕа Саха сирин чөмпүйэнээттэрин тэҥэ, Степан Алексеев кубогар бильярдка өрөспүүбүлүкэ сүрүн күрэхтэһиитэ, “Россия хайыһара-2017”.
Петр Павлов, «Саха сирэ» хаһыат, www.edersaas.ru
Өскөтүн бу иннинэ СӨ бильярдка федерациятын вице-президенэ, национальнай көрүҥҥэ спорт маастара Степан Степанович Алексеев аатынан күрэхтэһии кэриэстэбил быһыытынан ыытыллар эбит буоллаҕына, быйылгыттан ыла аны кини аата өрөспүүбүлүкэ чөмпүйэнээтигэр иҥэрилиннэ. Онон чөмпүйэнээт кулун тутар 24-26 күннэригэр киин куорат “Краузе”, “Леман”, “Триумф”, “Грикон” бильярдка кулууптарыгар 16 улуус уонна Дьокуускай куорат хамаандатын спортсменнарын, барыта 135 бильярдиһы түмтэ. Кинилэр саастарынан араарыллан, түөрт бөлөххө хайдыһан күрэхтэстилэр.
Оҕолор бөлөхтөрүгэр 20 үөрэнээччи оонньообутугар – кыайыылааҕынан Орто Халыматтан кэлбит 17 саастаах Валера Оконешников буолла. Кини быһаарыылаах киирсиигэ үөрэнээччилэргэ өрөспүүбүлүкэ икки төгүллээх кыайыылааҕа, 13 саастаах Данил Акимовы (Дьокуускай) хотто.
Дьахталларга 14 киһи күрэхтэстэ. Маныаха эрдэттэн сэрэйиллибитин курдук, бастакы миэстэни өрөспүүбүлүкэ хас даҕаны төгүллээх чөмпүйүөнэ Мария Бельчусова (Дьокуускай) эрэллээхтик ылла. Кини кэнниттэн иккис миэстэҕэ былырыыҥҥы кыайыылаах Лена Хинчагова таҕыста.
Оттон 50-тэн 60-гар диэри саастаахтарга 56 кыттааччы күөн көрүстэ. Түмүккэ Мирнэй оройуонун Удачнай куоратыттан кэлбит Геннадий Супрун – Елисей Капитоновы (Бүлүү) кыайан, чөмпүйүөн үрдүк аатын ылла.
Бастыҥнар бөлөхтөрүгэр (18-тан 50-гэр диэри саастаахтарга) 45 бильярдист күөн көрүстэ. Эрдэттэн сылыктааһын быһыытынан, кыайыылааҕынан норуоттар икки ардыларынааҕы кылаастаах спорт маастара Александр Чепиков буолла. Кини бүтэһик быһаарыылаах киирсиигэ спорт маастарыгар хандьыдаат Василий Кудрины хотто.
Манна даҕатан эттэххэ, чөмпүйэнээт саамай аҕа саастаах кыттааччытынан 78-таах Борис Павлович Максимов (Сунтаар) буолла. Оттон саамай эдэр кыттааччы – 10 саастаах Эрхан Пахомов (Амма). Маны тэҥэ, Томпоттон тренер Мичил Дмитриевич Жиркову бэлиэтиэххэ сөп. Кини биэс оҕону аҕалан күрэхтэһиннэрдэ. Ити курдук, Үөһээ Бүлүүттэн хамаанда тэринэн кэлбиттэрин санатар тоҕоостоох. Ол курдук, тренер Альберт Попов, судьуйа Семен Миронов бэтэрээннэргэ Александр Владимирович Варламовы, Борис Иванову, Март Яковлевы, Михаил Яковлевы, оҕолорго Кеша Бочкареву, Сережа Васильевы, Алеша Васильевы кытыннардылар.
Бильярд спордун көҕүлээччи, “СаХабар” уопсастыбаннай түмсүү салайааччыта Виссарион Дмитриевич Балбахов:
— Степан Алексеевы кытта ааспыт үйэ 80-с сылларыгар Хабаровскайга биир кэмҥэ үөрэммиппит. Кини – педагогическай, оттон мин политехническай институкка үөрэммиппит. Оччолорго Хабаровскайга 600-чэкэ саха ыччата үөрэнэрэ. Степан туохха барытыгар наһаа көхтөөх этэ. Оннооҕор сүүрүүгэ уонна волейболга Хабаровскай кыраай хамаандатын састаабыгар киирэ сылдьыбыттаах. Степан Степанович бильярд спорда сайдарыгар улахан өҥөлөөх киһи. Сыыстарбат буоллахпына, Дьокуускайга бастакынан бильярд кулуубун аһан үлэлэппитэ. Кини кэриэһигэр турнир иккитэ ыытыллан баран, аны быйылгыттан өрөспүүбүлүкэ чөмпүйэнээтэ Степан Алексеев аатынан ыытыллар буолла. Манан сибээстээн, бильярд федерациятын бэрэсидьиэнэ Альберт Аркадьевич Алексеевка, вице-президент Вячеслав Владимирович Пакка, норуоттар икки ардыларынааҕы категориялаах судьуйа Андрей Васильевич Никифоровка, тренер Сергей Кириллович Семеновка барҕа махталбын тиэрдэбин.
Аны чугастааҕы кэмҥэ, кулун тутар 27-29 күннэригэр “Триумфка” Саха сирин аграрниктарын чөмпүйэнээтэ, кулун тутар 31 – муус устар 1 күннэригэр “Леман” бильярдтыыр кулуупка “Таатта-баан” үгэскэ кубулуйбут улахан бириистээх турнира ыытыллыахтара.
Петр ПАВЛОВ, “Саха сирэ”, www.edersaas.ru