Чөмпүйүөн Владимир Егоровы авиапорка уруйдаан-айхаллаан көрүстүлэр (ВИДЕОЛААХ)
Бүгүн Дьокуускай куорат авиапордугар Македония сүүмэрдиир хамаандатыгар киирэн, көҥүл тустууга 57 киилэҕэ диэри Дьобуруопа чөмпүйүөнэ буолары ситиспит Владимир Егоровы кэллиэгэлэрэ, успуорду сэҥээрээччилэр уруйдаан-айхаллаан көрүстүлэр. Санатар буоллахха, кини финалга Азербайджанец Алиаббас Рзазадени 10:0 кыайан, тустуунан дьарыктаммыт кэмнэригэр бастакытын Дьобуруопа чөмпүйүөнэ буолла.
«Маннык уруйдаан-айхаллаан көрсүбүттэриттэн олус үөрдүм. Түгэнинэн туһанан, Амма улууһун дьаһалтатыгар, чуолаан баһылык Николай Архиповка, норуот дьокутаата Руслан Федотовка, тириэньэрдэрбэр Александр Анатольевичка, Артур Константиновичка уонна миигин көрсөн эҕэрдэлээбит дьоҥҥо махталбын тиэрдэбин. Ыарахан киирсии финалга буолбута. Күүстээх тустааччылар баалларыттан улаханнык чаҕыйбатаҕым. Хайаан да киирсиэхтээхпин диэн күүстээх санааны ылыммытым. Ол түмүгэр, кыһыл көмүс мэтээли ылары ситистим. Инники былаан туһунан этэр буоллахха, билигин бастаан утаа атахпын көрдөрүнүөм. Эчэппитим, эмтэнэн баран, салгыы дьарыктаныам. Македонияҕа ардахтаах этэ, ол иһин иһирдьэ оҥорбуттара. Олус элбэх киһи кэлэн көрбүтэ, ыччаттар сэҥээрэллэр эбит. Оҕобун көрбөтөҕүм ыраатта, дьоммут ахтан аҕай кэллим», — диэн кэпсээтэ.
Норуот дьокутаата, меценат Руслан Федотов: «Болуодьа Амма улууһун Бөтүҥүттэн төрүттээх, сааһа 27-тэ. Ыал, оҕолоохтор, кэргэнэ Сунтаар кыыһа. Македонияттан легионер быһыытынан туһунна. Бастаан утаа Роман Дмитриев, Павел Пинигин, оттон Василий Гоголев чөмпүйүөннээбиттэрэ. Василий Гоголев 34 сыллааҕыта бастаабыта. Муус устар 14 күнүгэр Аммаҕа тахсыаҕа, чиэстиэхпит. Бырааттыы Егоровтар бары удьуор тустууктар. Эт-хаан өттүнэн кыанар, кыахтаах уонна киһи быһыытынан көрсүө-сэмэй уолаттар. Ис сүрэхпиттэн киэн туттабын, туох кыалларынан, көмөлөһө сылдьабын», — диэн үөрүүтүн үллэһиннэ.
“РИИХ Сахамедиа” АУо кэлэктиибин аатыттан ис сүрэхпититтэн эҕэрдэлээн туран, бу курдук эйигин кыайыы арыалластын диэн алгыспытын тиэрдэбит!
edersaas.ru