Анаабырдааҕы спорт оскуолатыгар быйылгы үөрэх дьылыгар 191 оҕо эрчиллэр. Үөрэнээччилэри спорт 6 көрүҥэр дьарыктыылларыттан билиҥҥитэ саамай ситиһиилээхтэрэ – бокс. Дьиҥэр, анаабырдар боксаҕа өрдөөҕүттэн биллэллэр. Билигин 20 уолу, 3 кыыһы спорт маастарыгар хандьыдаат, эдэр тренер Егор Соловьев дьарыктыыр.
-Оскуолабыт 2010 сыллаахха сабыллан баран, иккистээн 2015 сылтан аһыллыбыта. Инньэ гынан бүтүн көлүөнэни “сүтэрдибит” уонна барытын саҥаттан саҕалаатыбыт, — диир Егор. – Бастакы сылбытыгар өрөспүүбүлүкэҕэ кыттыбыппыт эрэ. Иккис сылбытыгар икки уолум чөмпүйүөннээбитэ. Быйыл саас муус устар 9-14 күннэригэр Нерюнгри куоракка ыытыллыбыт Уһук Илиҥҥи уокурук күрэхтэһиитигэр Роман Винокуров 44 киилэҕэ 15-16 саастаах уолаттарга бастаата, Валентин Платонов 52 киилэҕэ иккис буолла. Ити эрэ иннинэ Россия үтүөлээх тренерэ Николай Размахнин кэриэһигэр Бүтүн Россиятааҕы турнирга Валентин Платонов уонна Наталья Акакиева 56 киилэҕэ иккис, Роман Винокуров 46 киилэҕэ, Егор Винокуров 52 киилэҕэ үһүс миэстэлэри ылбыттара. Аны сорукпут – Россия түһүлгэтигэр тахсыы.
Анаабыр боксаҕа оскуолатыгар “Азия оҕолоро” норуоттар икки ардыларынааҕы оонньуу 3 чөмпүйүөнэ, 3 спорт маастара иитиллэн тахсыбыттара. Алексей Васильев аан дойду чөмпүйэнээтин призера, Алексей Попов оҕолорго Россия чөмпүйүөнэ (2010 с.) буолары ситиспиттэрэ. А.Попов чаҕылхайдык тахсан иһэн, ууга былдьанан, суорума суолламмыта хомолтолоох. “Билигин дьарыктана сылдьаллартан талааннаах 5-6 уоллаахпын уонна кыыспар Наталья Акакиеваҕа эрэнэбин”, — диир Егор Соловьев.
Роман Винокуров Уһук Илиҥҥэ бастыырыгар Саха сирин чөмпүйүөнүн кыайбытын туһунан атын дьонтон эрдэ истибитим. Саҥардыы бэрчээккэ кэппит уол Сааскылаах кыараҕас саалатыттан тиийэн, Олимпийскай эрэл оскуолатын иитиллээччитин сынньан кэбиһиитэ Анаабыр боксаҕа оскуолата инникилээҕин кэрэһилиир. Эһиил Сааскылаахха саҥа спорткомплекс тутуллан киирдэҕинэ, туундара хоһуун уолаттарын ааттара улахан түһүлгэлэртэн дорҕоонноохтук иһиллэр буолуоҕар бүк эрэнэбин.
Василий НИКИФОРОВ.
Хаартыскаҕа: Анаабырдааҕы спорт оскуолатын боксаҕа тренерэ Егор Соловьев иитиллээччитэ, Уһук Илин чөмпүйүөнэ Роман Винокуровтыын.