СӨ Ил Дархана Айсен Николаев ыам ыйыгар ыыппыт биир мунньаҕар киһи олоҕун орто уһунун туһунан боппуруоска тохтообута. “Кэнники сылларга өрөспүүбүлүкэҕэ нэһилиэнньэ сааһыгар орто көрдөрүү тупсубута бэлиэтэнэр», — диэн чопчу сыыппараларынан холобурдаабыта.
edersaas.ru
Онуоха кэккэ дьаһаллар ылыллаллар. Холобур, Саха сиригэр нэһилиэнньэ өлүүтүн аҕыйатар туһуттан кардиология диспансерын иккис уочарата тутуллуохтаах, Мииринэй, Нерюнгри, Алдан куораттарга уонна Хаандыга бөһүөлэгэр тымыр-сүрэх ыарыыларын эмтиир кииннэр саҥардыллыахтаахтар.
“Доруобуйа харыстабыла” национальнай бырайыак чэрчитинэн Саха сиригэр “Чөл олоҕу көҕүлээһин” өрөспүүбүлүкэтээҕи судаарыстыбаннай бырагыраама олоххо киллэриллэр.
Валентина Кузьмина, психотерапевт-быраас, Чөл олох аан дойдутааҕы академиятын профессора, аан дойдуга чөл олоҕу бөҕөргөтүү иһин көмүс мэтээл хаһаайката:
— Бэлиитикэҕэ улаханнык быһаарсыбаппын да буоллар, Айсен Николаев Саха сирин Ил Дарханынан биир сыл үлэлиир кэмигэр тахсыбыт элбэх уларыйыыны, саҥаны киллэриини бэлиэтии көрөбүн.
Кини ырааҕы толкуйдуур, билиитэ-көрүүтэ киэҥ уонна ханнык баҕарар боппуруоска быһаарсар. Онон, Айсен Сергеевичтэн элбэҕи күүтэбит, ол иһигэр чөл олох хамсааһынын өйүөҕэр эрэнэбит. Кинини кытары тус көрсөн, арыгылааһын уонна ону суох оҥоруу туһунан кэпсэтиэхпин баҕарабын. Биһиги хамсааһыммыт чилиэннэрин уонна Матвей Лыткин санааларын истэрэ буоллар, барыбытыгар туһалаах буолуо этэ.
Надежда ЕГОРОВА, “Саха сирэ”, edersaas.ru