Муус устар 10 күнүгэр Мэҥэ Хаҥалас улууһун Майа сэлиэнньэтигэр өрөспүүбүлүкэтээҕи чөл олох форума буолар. Форум өрөспүүбүлүкэҕэ чөл олоҕу тарҕатыы хамсааһына 45 сылыгар уонна онно улахан өҥөлөөх, РФ үтүөлээх учуутала Иннокентий Сергучев 85 сааһыгар ананар.
Билиҥҥи туругунан, барыта 171 нэһилиэк арыгы атыытыттан аккаастанна. Саха сирин бу уопутун Ямал-Ненец уокуруга, Тыва, Башкирия, Марий-Эл өрөспүүбүлүкэлэрэ, о.д.а. сиһилии үөрэтэн көрөн, бэйэлэригэр киллэрэр, тарҕатар былааннаахтар.
Форумҥа бу нэһилиэктэр баһылыктара, уопсастыбанньыктар, тыа сирин көхтөөх ыччата кыттыахтара. Үс секциянан үлэ ыытыллара күүтүллэр:
-
“Чөл олохтоох сэлиэнньэттэн – чөл олохтоох өрөспүүбүлүкэҕэ”;
-
“Ыччат арыгыта суох чөл олоҕу талар”;
-
“Чөл олох тирэх кииннэрэ”.
2010 сылтан 2017 сылга диэри арыгылааһыны, алкогольнай психоһу, буруйу оҥорууну, өлүүнү ырытан көрдүлэр. Манна Ил Дархан информационнай киинэ, Арыгы атыытын сүрүннүүр управление, Москваттан кэлэн “Циркон” экспедиция ыыппыт социологическай чинчийиилэрин дааннайдара туһанылыннылар. Бу уопуту салгыы кэҥэтэн, судаарыстыбаннай былаас, олохтоох бэйэни салайыныы, уопсастыбанньыктар уонна көрдөрөр-иһитиннэрэр сириэстибэлэр күүстэрин түмэн, ыччакка, нэһилиэнньэҕэ тарҕатар соруктаахтар.
Ангелина Васильева, “Саха сирэ” хаһыат, edersaas.ru