СӨ Госалкогольконтроль управлениета «Саха сирэ арыгылааһыны утары» регионнааҕы уопсастыбаннай хамсааһыны, уопсастыбанньыктары уонна чөл олох актыбыыстарын кытары өрөспүүбүлүкэҕэ «Чөл олох десанын» салгыы ыытар.
Надежда ЕГОРОВА, «Саха сирэ» хаһыат, edersaas.ru
Кинилэр маннык көрсүһүүлэргэ нэһилиэнньэҕэ арыгы бородууксуйата, психоактивнай веществолар буортуларын, чөл олох үтүө өрүттэрин туһунан лекциялары ааҕаллар. Учууталларга, педагогтарга, быраастарга, дьаһалталар исписэлиистэригэр семинардары ыыталлар.
Соторутааҕыта «Чөл олох десана» Уус Алдан уонна Мэҥэ Хаҥалас улуустарынан айаннаан кэллэ.
Уус Алдаҥҥа
Муус устар 12-13 күннэригэр Уус Алдан улууһугар управление исписэлиистэрэ нэһилиэк дьаһалтатын кытары көрүстүлэр. Психоактивнай веществолары туһаныыны сэрэтии, аныгы усулуобуйаҕа оҕолору иитии кистэлэҥнэрин, Саха Өрөспүүбүлүкэтигэр арыгыны утары ыытыллар бэлиитикэни олоххо киллэрии үөрүйэхтэрин кэпсээтилэр. Семинардары управление мониториҥҥа уонна иһитиннэриигэ отделын салайааччы Ульяна Булдакова, үрдүк категориялаах невролог-быраас, эксперт, СӨ Гражданскай уопсастыба институтун сайыннарыы министиэристибэтин граҥҥа хамыыһыйатын чилиэнэ, чөл олох аан дойдутааҕы академиятын доцена Ида Белых кытыннылар. Онтон оскуола үөрэнээччилэригэр «Чөл олох уонна доруобуйа – ситиһиилээх олох мэктиэтэ» итиэннэ «Төрөөбүт сэлиэнньэ кэскилэ – ыччаттар илиилэригэр» лекциялары аахтылар.
«Чөл олох десана» акция түмүгүнэн Өспөх нэһилиэгэр «Уопсай дьыала» диэн доруобуйа харыстабылыгар анаммыт киинэни көрүүнү тэрийэргэ, сэлиэнньэ уулуссаларыгар чөл олоххо сыһыаннаах социальнай былакааттары уонна баннердары ыйыырга, оҕолорго уонна төрөппүттэргэ чөл олох боппуруостарыгар холбоһуктаах дьарыктары ыытарга быһаардылар.
Мэҥэ Хаҥаласка
Десант кыттыылаахтара муус устар 14 күнүгэр икки тыһыынчаттан тахса нэһилиэнньэлээх Төҥүлү сэлиэнньэтигэр тиийдилэр. Нэһилиэк баһылыга бэлиэтээбитинэн, нэһилиэнньэ ортотугар арыгылааһын боппуруоһа сытыытык турар, онон маннык акциялар олус туһалаахтар.
Көрсүһүүлэргэ уопсастыбаннас, полиция, оскуола, техникум, култуура дьиэтин үлэһиттэрэ, актыбыыстара кыттан чөл олоҕу сырдатыы боппуруостарын дьүүллэстилэр. «Арчы дьиэтэ» духуобунай култуура киинин фольклорга методиһа Анна Холмогорова саха норуотун култууратыгар тирэҕирэн оҕолоруу иитии, «Шпаргалка для родителей» сурунаал кылаабынай эрэдээктэрэ Виктория Константинова уонна юрист үөрэнээччилэргэ чөл олох өйдөбүлүн иҥэрии туһунан кэпсээтилэр. Семинар кэнниттэн төрөппүттэр оҕолорун арыгыттан уонна психоактивнай веществолартан эрдэттэн хайдах харыстыыр туһунан интэриэһиргээн ыйыталастылар.
«Чөл олох десана» өрөспүүбүлүкэ улуустарынан салгыы айанныыр. Сотору кэминэн Горнай уонна Мирнэй улуустарын нэһилиэнньэтин кытары көрсүөхтэрэ.
Надежда ЕГОРОВА, «Саха сирэ» хаһыат, edersaas.ru