Чөл олох араактан харыстыыр

Бөлөххө киир:

Араак ыарыы үөскүүр кутталын 70 бырыһыанын чөл олох көмөтүнэн туоратыахха сөбүн туһунан бигэргэтэллэр. Ону РФ Доруобуйа харыстабылыгар министиэристибэтин ыарыыны мэдиссиинискэй сэрэтиигэ штаты таһынан кылаабынай исписэлииһэ Любовь Дроздова бэйэтин сүбэлэригэр чопчулуур.

edersaas.ru

«Искэн үөскээн сайдар кутталын 70 бырыһыанын киһи бэйэтэ чөл олох көмөтүнэн туоратар кыахтаах. Ол гынан баран, биһиги дьоммут «ЗОЖ» диэн кистэнэ сылдьар 3 буукубаны көрдүлэр-иһиттилэр да, итэҕэйбэт курдук тутталлар, ээл-дээл сыһыаннаһаллар. Сотору ааһар муода, фитнес-кииннэр уонна барыларыгар сөп түбэспэт аһылык курдук эрэ саныыллар. Онтон дьиҥэр, хамсаныы-имсэнии, үчүгэй аһылык уонна буортулаах дьаллыктары туоратар туһунан этиллэр. Буортулаах дьаллыктар араак эрэ буолбакка, сүрэх-тымыр, тыынар уорганнар ыарыылара сайдалларыгар «улахан кылааттарын» киллэрсэллэр. Ону таһынан, араакка тириэрдэр биир куһаҕан дьайыынан табахтааһын буоларын санатабын. Киһи табахтан аккаастаннаҕына, бэйэтин үбүн эрэ харыстыыр буолбатах, саамай улахан инвестицияны бэйэтин доруобуйатыгар оҥорор.
Кэккэ чинчийиилэр көрдөрбүттэринэн, үчүгэйдик ыраастамматах, буһарыллыбатах бородуукталары туһаныы эмиэ искэн үөскүүрүгэр тириэрдиэхтэрин сөп. Бу ордук эт уонна халбаһы оҥоһуктарга сыһыаннаах. Бу бородуукталар үксүгэр куртах-оһоҕос трагын ыарыытын көбүтэллэр. Аһылык арааһыгар элбэх оҕуруот аһын уонна фруктаны киллэрэ үөрэниҥ. Сууккаҕа 400 граммҥа диэри оҕуруот аһа эбэтэр фрукта олус туһалаах.
Ону таһынан, арыгы онкология ыарыыларын кытары быһаччы сибээстээх. Арыгыны иһиини аҕыйатарга эбэтэр олох да тохтоторго сүбэлиэм этэ. Эти-хааны сайыннарыы олус улахан суолталаах. Булгуччу ханнык эрэ ыарахан ноҕурууска баар буолуохтаах диэн буолбатах, күҥҥэ 30 мүнүүтэ физкультуранан дьарыктаныы олус туһалаах».
Любовь Дроздова: «Диспансеризацияны  уонна мэдиссиинискэй чинчийиилэри көтүтүмэҥ», —  диэн  сүбэлиир. Диспансеризацияҕа туттуллар сүрүн скрининнэр,  киһи организмыгар бэл, биллэрбэккэ сылдьар сибикилэри  булар кыахтаахтар.

Надежда ЕГОРОВА, «Саха сирэ» хаһыат, edersaas.ru

Хаартыска: pojrem.ru  ылылынна

+1
0
+1
0
+1
0
+1
0
+1
0
+1
0
+1
0