Дохсуннук сайдар үйэҕэ ыччат ортотугар чөл олоҕу тутуһуу, спордунан, физкультуранан дьарыктаныы инники күөҥҥэ тутуллар, атыттарга үтүө холобур буолар. Маннык хабааннаах үлэ Дьокуускай куоракка Светлана Валерьевна Калинина дириэктэрдээх тутуу-коммунальнай техникумугар ситиһиилээхтик, тиһиктээхтик тэриллэр.
Доруобуйа күнүгэр анаммыт тэрээһин техникумҥа устудьуоннар, кэлэктиип көхтөөх кыттыытынан олус сэргэхтик буолла. Техникум иитэр үлэҕэ тэрийээччи педагога Иустиния Турнина кэпсиир:
— Доруобуйа күнүгэр анаммыт тэрээһиммитигэр СПИД Профилактика киинин салаатын сэбиэдиссэйэ Кононов Е.А., наркология диспансерын психиатр-бырааһа, нарколога Константинова А.В., өрөспүүбүлүкэтээҕи тирии-венерологическэй ыарыылары эмтиир диспансер профилактикаҕа салаатын сэбиэдиссэйэ Николаева А.Д. кытыннылар.
Бу күн сарсыардаттан устудьуоннар, үлэһиттэр тэрээһиҥҥэ көхтөөхтүк кытыннылар. «Доруобуйаны эрдэттэн харыстыахха» диэн этиинэн салайтаран, анаалыстары туттардыбыт. Маныаха туттарбыт анаалыстарбыт уопсай түмүктэрин көрдөрүүтэ үчүгэй буолан, бары улаханнык үөрдүбүт.
Салгыы эдэр саас эрчимнээх кэнсиэрэ саҕаланна. Үөрүүлээх чаас аныгы тэтимнээх үҥкүүнэн саҕаланна. Кэрэ куоластаах ырыаһыт кыргыттарбыт А.Акакиева, А.Бурнашева көрөөччүлэр биһирэбиллэрин ылыахтарын ыллылар. Бастакы куурус устудьуона С.Соловьев хомуска оонньоон дьүрүһүтэн, саалаҕа олорооччулары абылаата. Болҕомтону тардыбыт сонун ньүөмэринэн А.Ховров толоруутугар бит-бокс буолла. Үөрүү-көтүү өрөгөйүн өссө үксэтэн, техникум дириэктэрэ С.В.Калинина өр сыл бииргэ үлэлэһэр сотрудниктарбытыгар дохсун ытыс тыаһынан доҕуһуоллатан Махтал суруктары туттартаата.
Иустиния Максимовна ол кэнниттэн ыҥырыылаах ыалдьыттар киһи эрэ сонурҕаан, сэргээн истэ олоруох лекцияларын аахпыттарын, ыйытыыларга хоруйдаабыттарын, сэһэргэһии тахсыбытын астына бэлиэтиир. Мэлдьи буоларын курдук, быйылгы да викторина улахан сэргэхсийиини таһаарбыт. Эрдэттэн ох курдук оҥостубут, кур курдук куоһаммыт хамаандалар эрбии тииһин курдук эгил-тэгил киирсибиттэр. Дьэ, ким кыайар эбитий диэн көрөөччүлэр улаханнык долгуйа кэтээбиттэр-манаабыттар. Түмүккэ, УЭД I кууруһун хамаандата бастаан, ыччаттар үөрүү-көтүү бөҕө буолбуттар. Иккиһи МОСР-18, үһүс бириистээх миэстэни СиЭЗ-17 (иккис куурус оҕолоро) хамаандалара ылан эҕэрдэ эриэккэһин туппуттар. Билиини-көрүүнү тургутар күрэс кыттыылаахтара бары киэҥ билиилээхтэрин, чөл олоххо тардыһыылаахтарын көрдөрөн хайҕаммыттар.
— Маннык тэрээһин биһиэхэ үгэс курдук сылын аайы ыытыллар. Маныаха ис хоһооно кэҥээн, кыттааччытын ахсаана элбээн иһэр. Манна даҕатан эттэххэ, эдэр ыччаты чөл олоххо уһуйуу — уопсастыба биир сүрүн ирдэбилэ. Итиниэхэ биһиги үөрэхпит кыһата бу хайысхаҕа улахан болҕомтотун ууран тиһиктээхтик үлэлэһэр, — диэтэ.
Техникум кэлэктиибэ үлэлэһэр бары тэрилтэлэригэр барҕа махталларын тиэртилэр. Итиэннэ биир сыаллаах-соруктаах, биир санаалаах түмсэн, көмөлөөн оҥорор тэрээһиннэрэ үтүө түмүктэрдээх буолуоҕар эрэнэллэрин биллэрдилэр. Онтон ыччаттар чөл олоҕу тутуһалларын, маннык тэрээһин хас биирдиилэригэр туһалааҕын, эдэр киһиэхэ хаһан баҕарар өйдөтөр-сүбэлиир үлэ ыытыллара наадалааҕын эттилэр. Маннык көрсүһүүлэргэ куруутун да көхтөөхтүк кыттарга бэлэмнэрин биллэрдилэр.
Сардаана БАСНАЕВА, «Саха сирэ» хаһыат, edersaas.ru
+1
+1
+1
+1
+1
+1
+1