Муус устар 5 күнүгэр СӨ Бырабыыталыстыбатын Бэрэссэдээтэлин солбуйааччы Ольга Балабкина уочараттаах брифинин ыытта.
Бүгүн Ольга Валерьевна туох туһунан сэрэттэ? Кини Үлэҕэ уонна социальнай көмүскэлгэ министиэристибэтин иннигэр аҕам саастаах дьоҥҥо кыһамньыны күүһүрдэргэ сорудахтаата. Ол курдук, волонтердар үлэлэрэ күүһүрүөхтээх. Кырдьаҕас дьон ыалдьара үксээбитинэн, 65+ саастаахтар хааччахтанан олорууну тутуһуохтаахтар. Ити хааччахтааһыҥҥа арай быһыы ылбыт саастаах дьон хапсыбаттар. Онон тэрийээччилэр (сэрэйдэххэ, араас кэнсиэртэри эҥин буолуо) бу ирдэбили тутуһуннарбатахтарына эппиэтинэскэ тардыллалларын санатта. Ону тэҥэ Доруобуйа харыстабылын министиэристибэтэ ковидынан ыалдьыбыт дьону чөлүгэр түһэрии пуондатын улаатыннарыахтаах. Бу көмөҕө төһө киһи наадыйарын билэр туһугар чөлүгэр түһэриигэ сурутуу ыытыахтаахтар.
Оттон бүгүҥҥү туругунан санэпид балаһыанньа хайдаҕый? 29 киһи дьаҥҥа хаптарбытын быһаарбыттар. Итинтэн Дьокуускайга – 19, Нерюнгрига – 2, Бүлүү, Мииринэй, Ньурба, Өлүөхүмэ, Сунтаар, Таатта, Томпо, Уус Алдан оройуоннарыгар – 1-дии түгэн. Суукка устата өрөспүүбүлүкэ лабораториялара 1037 чинчийиини оҥорбуттар.
Бүгүҥҥү туругунан өрөспүүбүлүкэҕэ 100912 доза быһыы кэлбит. Итинтэн бастакы быһыыны 60742 киһи ылбыт, иккистэрин – 52845.
Суһал ыстаап салайааччытын солбуйааччы Ольга Балабкина сэрэтиитин тутуһуҥ!
Бэлэмнээтэ Женни Стрюкова
Хаартыска: http://sakha.gov.ru